MYLOAN E APESA BALETSA-PHALA SEAPARO SE SECHA
Ka ’Matlhohonolofatso Lebesa
La 15 Tšitoe 2023
Khoebo e fanang ka mekitlane ea Myloan Limited e fane ka mokhahlelo oa bobeli oa tšehetso ea seaparo ho baletsa-phala ba papali ea bolo ea maoto, Lesotho. Tšebeletso ea phano e bile liofising tsa Lesotho Football Association (LEFA), Bambatha Sports Arena ka la 8 Tšitoe 2023.
Basebetsi ba Myloan ba pepesa seaparo se secha [Image – LEFA]
Dr. Khoarane Khoarane, o buile lebitsong la mookameli-kakaretso oa Myloan [Image – LEFA
A re ba nka baletsa-phala e le batho ba bohlokoa ka ho fetisisa kahare ho naha ea Lesotho kaha ha ba le sieo papali e ka se tsoele-pele. “Re motlotlo haholo hore selekaneng sa rona le LEFA re ntse re sebetsa hantle haholo le bona.” Ho rialo Dr. Khoarane.
Lebitsong la baletsa-phala, mongoli oa mokhatlo oa baletsa-phala, Retšelisitsoe Molise o supile hore ba motlotlo haholo hore ebe ba na le seaparo sena kaha ba na le tumelo hore se tla phahamisa boleng ba bona e le baletsa-phala. “Bo-ntate le bo-’me kaparo ena e ntle ha re il’o etsang tšebetso. “Ho rialo Molise a fana ka liteboho.
Ka lehlakoreng le leng lebitsong la LEFA mongoli-kakaretso, Mohapi Mokhosi, o itse ha ho oa ba bobebe ho amohela lithuso tsena kaha a ne a se na leseli le batsi hore na ke mofuta ofe oa khoebo. A re e le mokhatlo o tsamaisang papali ea bolo, ba leboha ha ho na le batho ba ananelang bohlokoa ba papali ea bolo.
“Selekane sena se teng ka lebaka la matsapa ao re bileng le ’ona leetong lena la rona, moo kajeno baletsa-phala ba rona ba hlomphehang kahara seaparo sa boleng bo holimo haholo.” Ho rialo Mokhosi.
Mokhosi Mohapi, mongoli-kakaretso oa LEFA [Image – LEFA
A re ho fihlile boithutong ba hae hore linaha tse holang haholo lipapaling ke tseo likhoebo tse ikemetseng li keneng ka matla ho tšehetsa lipapali. A re qholotso e teng eo likhoebo li kopanang le eona ea lekhetho ha li tšehetsa litaba tsa lipapali o se a le mothating oo a ntseng a e sebetsa le ba ikarabellang.
“Re na le policy ea lipapali eo ke hlokometseng hore e tlameha ho kena tšebetsong e le ho phahamisa botsamaisi ba lipapali.” Ho rialo Maqelepo. A re o tlo sebetsa ka thata hore lebala la Setsoto le boele boemong ba tšebetso e le hore Basotho ba tle ba bont’se tšehetso papaling ea bolo ea maoto.
