ECONET E QOSOA KA HO SEBELISA FITIEO EA ‘SOMETHING KAOFELA’

ECONET E QOSOA KA HO SEBELISA FITIEO EA ‘SOMETHING KAOFELA’

Ka Moipone Makhemeng

La 29 Pulungoana 2023

Nyeoe e hlahletsoeng ke monna oa Mosotho, Ramputi Francis Mokhethi khahlanong le Econet Telecom Lesotho (ETL) e mametsoe kajeno Lekhotleng le Phahameng la Maseru ka lekhotleng la khoebo (commercial court).

Mokhethi o tseka hore ETL e sebelisitse fitio ea hae e ileng ea tuma ka lebitso #sumfingkaofela lipapatsong tsa eona ntle le tumello ea hae.

‘Muelli oa molli ke Adv. Mokobori athe oa k’hamphani e seng e boletsoe ke Adv. Letsika ha moahloli ea mametseng nyeoe e le mohlomphehi Moneuoa Kopo.

Adv. Mokobori o teketse lekhotla hore bopaki ba hae nyeoeng ena bo tla its’etleha ho lipaki tse peli ‘moho le liponts’uoa tse ‘digital’.

Ho sa le joalo, paki ea pele e bile eena molli – monghali Mokhethi ea thakhotseng bopaki ba hae ka ho beha kapele ho lekhotla hore ka la 22 ‘Mesa 2021, o ile a nka leeto la khoebo ho ea Bokong ha Katse ka sepheo sa ho fumana le ho reka boea ba lipoli. O re ha a le tseleng e lebang Bokong, ke moo a ileng a kopana le monna oa Mosotho ea bitsoang Mosiuoa Hlaeng ‘me ba qoqa ka hore na boea a ka bo fumana hokae.

“Ha re se re qoqile, a ntjoetsa hore na boea nka bo fumana kae. Re boetse hape ra buisana ka ho ikuka senepe le fitieo le monna eo (Hlaeng). Fitieo eo mohlomong e ileng ea tsebahala haholo kapa ho tuma ka lebitso la #sumfingkaofela. Re ile ra e nka fitieo eo.” Mokhethi o fana ka bopaki.

Khatiso ea fitieo e ile ea bapalloa lekhotla ‘me paki ea fana ka tlhaloso ea hore ke eena ea nkileng fitieo eo. O re lentsoe le utloahalang moo le leng ke la hae kaha ke eena ea neng a hatisa fitieo eo a bile a hloma Hlaeng lipotso.

Paki ha e tsoela-pele e bonts’a e ile ea tlala ka thabo ‘moho le ea neng a nkuoa fitieo ‘me ka lebaka la thabo e neng e khaphatseha o ile a beha fitieo eo ho lebota la hae la marang-rang a WhatsApp Status. Ke moo a reng fitieo e ile ea phatlalla le marangrang (went viral) ‘me a fumana mohala kamora mohala a botsoa ke batho hore na ke lentsoe la hae le hlahang fitieong moo.

“Ho ile h’a tuma haholo li-status tsa WhatsApp, Facebook, YouTube mantsoe a neng a hlahella fitieong a neng a re “Something kaofela”.

“Hangata batho ha ba thabile mohlomong e le letsatsi la hae la tsoalo o ne a sebelisa mantsoe ao – ‘Something Kaofela’.” Mokhethi o tsoela-pele ka bopaki.

Kamora moo, ‘muelli oa hae o ile a mo atamela a mo bonts’a tse ling tsa linepe tse hlahellang ho marang-rang a Facebook tseo e ‘ngoe e neng e na le tlhaloso ea hore “Tee ena ke Something Kaofela”. O ile a bonts’a a tla nehelana ka tsona e le bopaki bo bong holima nyeoe empa ‘muelli oa ETL a ba le khanyetso.

Adv. Letsika khang ea hae holima nehelano ea linepe tseo e bile hore paki ha e na tsebo ka linepe tseo le hore na ke bo-mang beng ba tsona. A re paki ha e tsebe hore na linepe tseo li hlaha kae, li entsoe hobaneng e li bonts’oa feela ke ‘muelli oa hae.

Ho feta mona o ile a supa hore paki e ntse e bala hore moo ho ngotsoe ‘something kaofela’ empa ho se joalo. Mohlala oo a ileng a o supa ke hore holima foto ea pele ho ngotsoe “sm thing” ha ea bobeli ho ngoetsoe “sumfin”.

O re tsena ke tse ling tsa lintho tseo batho ba li etsang feela ho ipha borui ba lintho tseo e seng tsa bona.

Nyeoe e tsoela-pele.

Ho sa le joalo, ka la 19 Tlhakubele 2022, bookameli ba Econet bo ne bo nehelane ka ntlo ea likamore tse peli ho monghali Mosiuoa Hlaeng ea neng a hlahella fitiong a re sumfing kaofela. Ntlo e ahiloe Sephareng, Bokong Leribe. Econet e ne e hlalose e ahetse monghali Hlaeng ntlo eo e le ho mo leboha ka lepetjo la sumfing kaofela leo k’hamphani e ileng ea le sebelisa lipapatsong tsa eona. Ntlo e nehelanoe e na le thepa ka hare joaloka bethe, raka le tse ling.