MOSALI O AHLOLOA LILEMO TSE HLANO KA HO NTŠA MPA
Ka Moipone Makhemeng
La 17 Pulungoana 2023
Mosali oa Semonkong Thaba-Ntšo, Ha Lepekola, Tiisetso Leisa (43) o ahlotsoe ho hlola teronkong lilemo tse hlano kapa ho itefella M5000 kajeno kamora ho fumanoa a le molato oa ho ntša mpa ka boeena.
Nyeoe e ne e mametsoe ke ‘maseterata oa Maseru, Teboho Tapole. Moqosuoa o ile a ipolela a le molato joalokaha a qositsoe. E le ho kopa pebofatso ea kahlolo, moqosuoa o ile a ikopela mohau; ha a itela bootloana, o itse o na le lesea le leng leo nkhono oa hae a tla sitoa ho le hlokomela kaha a kula.
Moqosuoa a tsoela-pele ho itela hore nkhono ke motho ea phelang ka lipilisi tsa bokuli ba hlooho tseo a li fuoang sepetlele sa Mohlomi. Ho feta mona, o teketse lekhotla hore ha a sebetse, o phela ka ho ritela joala ba matsoho.
Nkhono oa moqosuoa o ile a tiisa litaba tsa bophelo ba hae bo seng botle ‘me a mo kopela hore lekhotla le mo shebe ka mohau. A bontša hore ba soabile haholo ke liketso tsena tseo setloholo sa hae se li entseng.
Kamora ho hlahloba mabaka ana, lekhotla le ile la fanyeha lilemo tse ‘ne (4) ‘me moqosuoa a laeloa ho itefella sekete sa Maloti (M1000) seo a sitiloeng ho se patala ‘me o tla hoehla sekoebo sa hae setsing sa tlhabollo ea batšoaruoa.
