‘MOLOTSI O AHLOLOA LILEMO TSE 12 KA HO LEMATSA ‘M’AE
Ka Moipone Makhemeng
la 23 Mphalane 2023
Mohlankana oa Mosotho, Mphana ‘Molotsi (22) oa Lithabaneng, Maseru o bile lekhotleng la ‘maseterata kapele ho ‘maseterata Kolisang a qosoa ka teko ea polao ea ‘m’ae ka la 17 Hlakola 2023. Lengolo la qoso le re moqosuoa o ile a khobatsa ‘m’ae ‘Mamphana ‘Molotsi (45) ka pitsa ea ‘malikotoana ka maikemisetso, a ba mo nyekenya ka thipa ekasitana le ho mo khama.
Ho ea ka bopaki ba lehlatsipa ‘Mamphana ‘Molotsi, o re ka la 13 Hlakola 2023 lipakeng tsa hora ea 5pm le 6pm o ile a fihla malaeneng moo ba lulang a tsoa sepetlele Mafeteng a isitse bothata ba leoto. Ke moo a ileng a fumana mora oa hae Mphana ‘Molotsi a le sieo.
“Ke fumane mor’aka a le sieo joalokaha ke lula le eena. Pelaelo ea ka ebile hore o ile mosebetsing. Hamorao o ile a fihla, eaba ke re a hloekise ka tlung kaha a ne a siile ho le bohlasoa. O ile a hloekisa empa ka lemoha hore ha a thaba. Leha ho le joalo, kamora moo ke bone a se a thabile a bile a le thahasellong ea ho nthusa ke le mokuli oa leoto.”
Lehlatsipa le boetse la teka hore le ile la kopa mora hore a mo thuse ka ho patala rente ea M500 ea moo ba lulang kaha a ne a hloka chelete ka lebaka la ho lula sepetlele. O re o ile a bolella mora hore o tla mo lefa tsatsi le hlahlamang ntle le phoso. Motsoali o tsoela-pele hore ka le hlahlamang la 14 Hlakola 2023, Mphana o ile a ea toropong a il’o ntša chelete hoseng empa a khutla ka shoalane a mo fa M150 feela.
“Ngoan’aka o fihlile a noele joala a tauoe haholo. Ke ne ke tseba hore o na le chelete kaha a sebetsa ha khaitseli ea ka konterakeng. Kamora ho mpha M150 ke ile ka e beha eaba ke robala mora a le sieo. Ke mo utloile ha a fihla kameso ka la 15 Hlakola, a kokota ka tsoha ka mo bulela ke ntse ke hlotsa joalo.” Ke bopaki ba motsoali.
O re o ile a lemoha hore chelete eane eo a mo kalimmeng eona e M150 e nyametse. Ke moo a ileng a fumana mohala oa motho ea mo fang mosebetsi ‘me a re o tlo palama ka chelete eo ho bonahalang Mphana a seng a e utsoitse. O re o ile a bolella mora hore ke mona o utsoitse chelete eo a neng a mo kalimme. “Ke ile ka kopa motho e mong ho nkalima M100 eo a e romela ka Mpesa eaba ke kopa Mphana ho ea e ntša ‘me a feela a etsa joalo.
O boetse o re o ile a fa mora M100 eona eo ha a khutlile a re a il’o reka tsoekere e nyane eaba mora o khutla kameso ka bo-2am ea la 16 Hlakola 2023. O re o ile a mo bulela a kena a noele a mo botsa hore na chelete ea hae e kae empa a re ha e eo. “Re ile ra robala eaba ka 4am ka mo tsosa ka re a il’o batla chelete ea ka, hore e-be teng pele ho hora ea bosupa hoseng.”
O hlalosetsa lekhotla hore mora o ile a tsamaea letsatsing leo la la 17 Hlakola 2023 ‘me a khutla mantsiboea a shebahala a sa noa joala. O re mora o ile kopa tšoarelo litšitong tseo a mo etselitseng tsona, eaba kamora moo a kopa jakete a re oa apara. Ke moo a ileng a mo botsa hore na o ea kae empa a re ha a tsebe.
“Ke ile ka mo kopa hore a hlape kaha o ne a sa shebahale hantle, a le litšila. O ile a lumela eaba ha a sa tsamaile, ka lemoha hore o se a thabile hape ra robala. Ke ile ka atleha ho ea mosebetsing pejana ho moo eaba ke ba le chelete, ke moo a ileng a utsoa M50.00 ea ka. Ha ke mo botsa o ile a re ho setse M20 feela. ‘Mamphana o re o ile a bolella mora hore a tsoe ka tlung, a tsamaee.
“Ke moo a ileng a nkhorohela a nkhama nako e telele hlooho ea ka e shebile tlasa bethe. O ne a bua mantsoe a re ke hloka ho etsoa joalo hoba ke bolaile ntat’ae ha kea tlameha ho phela. Ke ile ka mo rapela hore a ntlohelle empa a hana hofihlela ke ea le maili-ili empa ho bonahala a ile a ntlohella ka hlaphoheloa.”
Lehlatsipa le re le ile la kopa hore mora a mo ise phaposing ea ho phehela hore a tsebe ho fumana phefumoloho e ntle, eaba oa mo isa kamora ho sisintha kaha a ne a re ‘m’ae o tlo etsa lerata a bitse batho. O ile a mpolella hore ke bolaile ntat’ae ebile a ka be a na le bokamoso hoja ntat’ae o ne a ntse a phela. Ke ile ka mo bolella hore ke lekile tsohle hore a be le bokamoso ka mo isa sekolong empa a se lahla ka lehare ka lebaka la boitšoaro ba hae.
“Ha ke mo bolella joalo ke ha a nkotla ka lifeisi a nthaha ka lieta a ba ntihela fatše. O bile a mpupetsa ka mosamo a ‘nyekenya ka thipa ‘meleng ‘me ka tsoa mali a mangata hoo ke ileng ka felloa ke matla eaba oa ntlohella. O ne a tšohile ka re a ntlohelle ke shoe ke le mong ke ha a tla baleha.” O teketse lekhotla joalo.
‘M’e o re o ile a tsoa ka tlung a pitika eaba moahisani oa mo lemoha a mo thusa a mo isa Queen Mamohato Hospital. “Ke ha ke tla hlokomela hore o ntlhabile ka thipa maqeba a tšeletseng a neng a rokiloe le hore hlooho o nkotlile ka pitsa ea tšepe.
Ho sa le joalo, Police Constable Chaka oa Lithoteng o ile a nehelana ka thipa le pitsa ea ‘malikotoana ho lekhotla e le lipontšuoa. Chaka o boletse ha thepa eo ba e bontšitsoe ke eena moqosuoa ha ba ile moo a lulang le ‘m’ae.
Sepolesa se re Mphana ‘Molotsi o ile a tšoaroa Motsekuoa moo a neng a balehetse teng kamora ho lematsa ‘m’ae. Bopaki bo supa ka boithaopo Mphana a ile a bolella mapolesa ho re o balehetse moo kamora ho hlaba ‘m’ae ka thipa
Ho sa le joalo, ‘maseterata Kolisang o lihile kahlolo ka la 20 Mphalane 2023 nyeoeng ena ‘me a pitla moqosuoa ka ho mo ahlola lilemo tse 12 chankaneng. ‘Maseterata o fanyehile halofo ea kahlolo a re moqosuoa a se etse tlolo ea molao e tšoanang. Moqosuoa o theohetse toronkong.
