‘MELAELLOA POLAONG EA MOPARAMENTE O HLAHA KHOTLA
Ka Moipone Makhemeng
La 13 Mphalane 2023
Hoseng kajeno monna oa Mosotho, Tebello Khabo (37) oa Lithabaneng, Ha Keiso, Maseru, ha morena Khoabane Theko, o ile a hlaha lekhetlo la pele lekhotleng la ‘maseterata Maseru kapele ho ‘masetereta Motlatsi Kolisang a qosoa ka polao ea moparamente oa mehleng, Mohlomphehi Fako Moshoeshoe. Mochochisi nyeoeng ena ke Keketso Motiki.
Fako Moshoeshoe [Photo Suplied]
Ho ea ka lengolo la qoso, moqosuoa o tobane le nyeoe ea ho tlola karolo ea 40 (1) e balelloa le ea 109 ea pokello ea litlolo tsa molao ea nomoro ea botšelela ea 2010. Qoso e supa ha Khabo ka la 11 Mphalane 2023 haufi kapa sebakeng sa Mohalalitoe mabapa le Hi-FI City Maseru, o ile a fafatsa mofu ka lethala la likulo ‘meleng ‘me a baka lefu la hae.
Moqosuoa o hlahile kapele ho ‘maseterata ka liofising e seng ka lekhotleng le bulehileng. O tla tsoa a le ka setsing sa tlhabollo ea batšoaruoa ho emela nyeoe.
Ho ea ka raliphatlalatso oa sepolesa, Senior Superintedent Kabelo Halahala, maobane mesong koloi ea mofu e ile ea chaisoa ke ea moqhobi oa mosali haufi le Hi-Fi City, Maseru. Eka mosali o ile a bontša a amohela molato hore o tla lefa tšenyo. Halahala o re mosali eo o ile a letsetsa motho e mong eo a ileng a mo bitsa ‘motsoala’ oa hae ho potlakela sebakeng seo. Fako o tlalehoa a ile a kopa moqhobi oa mosali hore ba emele mapolesa.
Nakong eo, eane ‘motsoala’ o ile a rotha ka hang-hang ho hlaha Lithabaneng. Ke moo ho fihleng hoa hae ho ileng hoa tlola khang e le ha mosali a bontša hore oa tsamaea a ke ke a emela mapolesa haholo ha a sa hane molato. Ke hona har’a qoaketsano eo Moshoeshoe a hlalosoang a ile a leba koloing ea hae ho lata sethunya. Ka ho panya hoa ntši monna eane ea bitsitsoeng o ile a thunyetsa ho Moshoeshoe, a re sihla fats’e ‘me a timella moo.
