TSA BO-MOSHEMANE E RE DCEO E PHENYE METSI KE BOPHELO MAHAFI
Ka Moipone Makhemeng
La 13 Mphalane 2023
Mokhatlo o ipitsang Tsa Ha- Bo-Moshemane-Ha-Li-Jooe o loanelang lihloliloeng tsa Lesotho, o kopile Lefapha la Toantšo ea Bobolu le Bomenemene (Directorate on Corruption and Economic Offences -DCEO) ho thakhola lipatlisiso khahlanong le letona la lihloliloeng, Mohlomi Moleko mabapi le morero oa hae ho tsoela-pele ka ‘moka oa Metsi ke Bophelo leha Ramolao e Moholo oa ‘Muso a elelitse hore ho qaloe tlhophiso ea ‘moka qalong.
‘Moka o tsoetse-pele ho tloha maobane ‘me o lebeletsoe ho fihlela pheletsong kajeno.
Pejana Moleko le tona-kholo Sam Matekane ba ile ba phatlalatsa hore ka la 12 ho isa la 13 Mphalane 2023 lekala la lihloliloeng le tla ts’oara ‘moka oa ‘metsi ka ts’ebetso ‘moho le k’hamphani ea Mo-Afrika Boroa, Mashudu Elias Ramano ea thehileng k’hamphani e bitsoang Metsi ke Bophelo kahara naha ea Lesotho.
Likateng tsa lengolo le ngolletsoeng DCEO ka la 9 Mphalane 2023 le bonts’a ha letona Moleko a na le seabo k’hamphaning ea Metsi ke Bophelo (Pty) Ltd joalokaha seboka se tla tsoela-pele kajeno le hosane ‘Manthabiseng Convention Centre. Balli ba bonts’a sena se makatsa ebile se se na na moelelo.
“K’hamphani ea Metsi ke Bophelo Pty Ltd e ngolisitsoe ka molao ka la 6 Loetse 2023, athe k’hamphani e ‘ngoe ea monghali Mashudu, Metsi ke Bophelo Advocacy Pty Ltd eona e ngolisuoe ka la 21 Loetse 2023. Ho boetse ho na le tumellano ea ts’ebetso (memorandum of understanding) e bonahalang letona la Lihloliloeng mohlomphehi Mohlomi Moleko a e tekenne ka la 25 Phato 2023. Sena ke sesupo sa hore letona le tekenne tokomane le k’hamphani e sa pheleng. Ke ka hona re reng DCEO e ke kene e batlisise na ho etsahalang.”
“E ‘ngoe eo re reng DCEO e e shebe ke hore letona ka ts’ebetso ea lona le ka bolisa ba lekala leo, o bonahala a na le thahasello e kholo ho Metsi ke Bophelo hoo a fileng k’hamphani ena mosebetsi oa ho tla ts’oara seboka ‘Manthabiseng Convention Centre empa methati ea procurement e sa lateloa. ” Mongoli oa Tsa Ha- Bo-Moshemane-Ha-Li-Jooe, Mojela Mafike o li beha joalo puisanong le Leihlo la Basotho.
Ho tsoela-pele o bonts’itse hore ho na le boqhekanyetsi bo etsahetseng moo a supang ho na le chelete eo African Development Bank e fileng ‘muso chelete e kaalo ka US$10 000 joalokaha letona le boletse. ‘Me potso ea hae e bile hore na chelete ena e kene polokelong ea lichelete ea mang ha e le moo letona le bonts’a hore le e kopetse Metsi ke Bophelo.
“Letona chelete ee e kene polokelong ea lichelete ea mang feela u joetsitsoe hantle ke Ramolao e Moholo oa ‘Muso hore o khaole maqhama le Metsi ke Bophelo. Ho itsoe o entse phoso ka ho tekena tumellano eno. E ‘ngoe hape potso ho letona ke hore na thahasello ea hau ke efe ntle le haeba joale u se u na le maqhama a lichelete le k’hamphani ea Mashudu.”
Mashudu Elias Ramano
Mafike o hlalositse hore ho na le batho ba 300 ba tsoang kantle ho naha ba tlil’o ba teng sebokeng seo ‘me ba rekiselitsoe litekete tsa boleng ba US$ 10,000. O re potso ho bona ke hore na chelete ena e ea akhaonteng ea mang.
Ho phethela Mafike o bontšitse hore litaba ha li le mothating ona ba se ba li behile matsohong a bo-ramolao ‘me akhente ea bona e il’o kenya nyeoe e potlakileng ka khotla.
Ho sa le joalo, koranta e nontse moeta-pele oa Basotho Patriotic Party, mohlomphehi Tefo Mapesela maikutlo mabapi le litaba tse seng li boletsoe. Eena o itse: “Ho na le motho ea batlang ho ea teronkong.”
Tefo Mapesela
