LEPOLESA KHOTLA KA POLAO EA MOTHO
Ka Moipone Makhemeng
La 9 Mphalane 2023
Moahloli oa Lekhotla le Phahameng la Maseru, Tšeliso Mokoko, kajeno o mametse mapaki a mararo nyeoeng eo ho qosoang lepolesa la Lesotho, Police Constable Lillo Pitiri ka polao ea mofu Lipakuoele Lehlosi ea ileng a timela ka la 17 Phuptjane 2017 a le khoebong ea mothamahane e bitsoang Monateng Cocobe, Quthing.
Hara lipaki tse hlahileng lekhotleng kajeno ke ea borobeli – Lance Seargent Ntholoane ea hlalositseng mosebetsi oa hae sepoleseng sa Mohale’s Hoek a ikarabella ntlong ea polokelo ea lithunya (armoury). O re o ikarabella lithunyeng tsa libistolo.
Paki e bolelletse lekhotla hore ka la 15 Phuptjane 2017 ba ile ba bolelloa hore ho tla ba le paterole e lebang Maseru tlhomamisong ea Tona-Kholo. H’a tsoela-pele o ile a tekela lekhotla hore kamehla ha ba na le lipaterole tse joalo moo ho tsamauoang esale ka matjeke, o ee a robale a nehelane ka lithunya ho mapolesa.
“Letsatsing leo la 15 Phuptjane 2017, ke ile ka fa mapolesa a mabeli lithunya ‘me har’a ‘ona ke hopola Police Constable Pitiri. Ke ile ka mo fa bistolo ea 9mm ea linomoro tse latelang; SP 1102460 hammoho le mahlahlela a robeli.” Lance Sergeant Ntholoane oa hlalosa.
O tsoele-pele ho bontša hore letsatsi le hlahlamang o ile a fuoa thomo e ‘ngoe ‘me kahoo a hloloa ho phutha lithunya joaloka tšoanelo.
O teketse lekhotla hore kamora beke a le sieo, o ile a teheloa mohala a botsoa ka lithunya tseo a li fileng mapolesa ‘me tlhaloso ea hae ea ba hore h’a ka li phutha kaha a ntse a le thomong eo e ‘ngoe.
Ke moo a ileng a tsebisoa hore har’a lithunya tseo a faneng ka tsona ho mapolesa, se seng se matsohong a sepolesa Quthing ka pelaello ea hore lepolesa Pitiri o thuntse motho ka sona.
Maletsunyane Mpesa
Paki e hlahlamang e bile ea borobong, Lance Sergeant Masithela oa Mafeteng. Eena o itlhalositse a sebetsa lefapheng la mafokisi. Ha a teka bopaki o itse ka la 21 Phuptjane 2017 ha a ntse a le ofising o ile a fumana tlaleho hore Cocobe, Quthing ntlong ea mothamahane e bitsoang Monateng ho bile le tlolo ea molao moo motho a thuntsoeng.
O re letsatsi le hlahlamang, o ile a etela sebaka seo ho ea se hlahloba. O bontšitse hore morekisi le ba neng ba le teng nakong ea lietsahala ba ile ba mo supisa sebaka seo ho thoeng tlolo ea molao e etsahetse ho sona.
“Ke ile ka hlahloba sebaka seo kantle le kahare. Empa ha ke fihla ke hlokometse hore ha ho na letho leo nka le amahanyang le tlolo ea molao; e ka ba sethunya, likhaketlana kapa mali; ha kea fumana letho.” Ke eena eo.
Ho sa le joalo, paki e ‘ngoe e bile Inspector Mollo oa Ha Foso ea sebetsang lefapheng la tlhahlobo ea lithunya (ballistic section) sepoleseng.
Mollo o re ka la 27 Phuptjane 2017 ofising ea hae ho ile hoa fihla lepolesa Telu ea sebetsang Quthing. O hlalosa hore eo o fihlile a nkile sethunya sa 9mm le likhaketlana tse peli. O re thepa ena e ne e pakiloe hantle e bile e ngotsoe bopaki bo ikhethang.
O hlaloselitse lekhotla hore lepolesa Telu o ne a batla ofisi ea ballistic e mo thuse ho hlahloba hore na likhaketlana tseo tse peli li thuntse ho hlaha sethunyeng seo sa 9mm.
O tsoetse-pele ho bontša hore kamor’a moo o ile a etsa litlhahlobo ‘me a fumana ho feela ho le joalo hore likhaketlana tseo li tsoile sethunyeng seo sa 9mm.
Ho sa le joalo, ‘muelli oa moqosuoa Adv. Mosoeu, o ile a bontša paki hore ka boiphihlelo ba eona ba ballistic le tsebo eo a e fihletseng tšebetsong ea sepolesa, oa tseba hore ntho eo e leng bopaki e bolokoa kahara polokelo e ikhethileng. ‘Me paki ea lumellana le eena. A boela a e bontša hore leha ho le joalo, likhaketlana tseo li ne li tšetsoe ka mokotleng oa chelete.
Ho feta mona, o ile a ‘motsa hore na o na le mokhoa oa ho tseba hore na bopaki bo fetile matsohong a makae pele bo ka fihla ho eena. Paki e bontšitse e se na tsebo.
Leqoetha le ile la hatela pele la bontša hore motho ofe kapa ofe ea tlileng le bopaki ho na le khonahalo e kholo hore a ka etsa tseo a li etsang pele bopaki bo joalo bo ka fihla ho eena empa Inspector Mollo o ile a bontša hore ha a na maikutlo holima ntlha e joalo.
Nyeoe e ntse e tsoela-pele.
