TELU-PUTSOA E LILEMO LI 95 KHOTLA KA PETO
Ka Moipone Makhemeng
La 18 Phato 2023
Monna-moholo ea lilemo li mashome a robong le metso e mehlano (95) oa Popanyane Roma ha morena Mitchelle Maama, o hlaile kapele ho ‘maseterata Puseletso Mcpherson lekhotleng la bana a qosoa ka ho khola chakatsa ho moroetsana ea lilemo li leshome le metso e mehlano (15).
Ho ea ka lengolo la qoso, monna-moholo ka la 15 Phato 2023 hona Popanyane o ile a kenya botho ba hae ka hare ho botho ba moroetsana ka mokhoa oa peto.
Moqosuoa kamora ho balloa qoso o tingoe monyetla oa ho itefella beile ‘me o tla tsoa a ntse a le polokelong ea bats’oaruoa. O lebelletsoe ho hlaha khotla hape ka la 30 Phato 2023 ho tla fumana letsatsi leo nyeoe ea hae e tlang ho mameloa ka lona.
