LIKOLO LI TŠOARA LINGANGISANO TSA MACHABA
La 5 Phato 2023
Ka Leihlo la Basotho
Ofisi ea Machaba a Kopaneng ea Litokelo tsa Botho (The UN Office of the High Commissioner for Human Rights – OHCHR) e hlophisitse tlholisano ea likhang kapa lingangisano moo ho tla hlolisana likolo tse ipabotseng kahara naha tse tšeletseng. Tlholisano e tla ba holong ea Lesotho High School ka la 18 Phato 2023 ka 14:00hrs.
Maletsunyane 2023
OHCHR e tšoarane ka mahetla le mokhatlo oa matichere, Lesotho Association of Teachers (LAT), e re tlholisano ena ke karolo ea lietsahala ho tšoaea lilemo tse 75 tsa Khoelehetso ea Litokelo tsa Mantlha tsa Botho (Universal Declaration of Human Rights).
Khoelehetso ea Litokelo tsa Mantlha tsa Botho e shebane le ho netefatsa hore litokelo tsa mantlha tsa botho li’a hlomphuoa lefatšeng. Khoelehetso e kentsoe tšebetsong ke Machaba a Kopaneng ka la 10 Tšitoe 1948 eaba naha ea Lesotho e tekenela khoelehetso ena ka la 19 Mphalane 1949.
Likolo li tla ngangisana separamente ka tšisinyo e latelang: “Ntlo ena e lumela hore Lesotho le sebelitse hantle haholo ho kenya tšebetsong “Khoelehetso ea Litokelo tsa Mantlha tsa Botho” (This house believes that Lesotho has done exceptionally well in the implementation of the Universal Declaration of Human Rights).
Baithuti ba tla tšetšetha tšisinyo ena ka sebopeho sa paramente ‘me sehlopha ka seng se tla boptjoa ka barutuoa ba bararo.
Likolo tse tla koebana ke tse latelang: Sehlopha sa pele: Soofia International School, Leribe English Medium High School le National University of Lesotho International School.
Athe sehlopha sa bobeli se bopiloe ka likolo tse latelang: Steven’s High School, Kingsgate High School le Lesotho High School.
