MAHONKO O KETEKA KHAU
Ka Moipone Makhemeng
La 4 Phupu 2023
Sengoli sa buka ea ‘How Can Basotho Move to the Next Level Economically’, Monghali Khotso Mahonko (31), o tšoere ‘moka oa bo-ralitaba maobane moahong oa Thola-Tuu, Maseru. Sepheo e ne e le ho keteka likatleho tseo buka ea hae e li fihletseng.
Buka e na le likhoeli tse tharo e hatisitsoe ’me ke likopi tse fetang 500 tse seng li rekisitsoe ho tloha e khakotsoe ka la 31 Tlhakubele 2023. Mahonko o boletse a qalile ho ngola a sa le monyane ka selemo sa 2011. Buka ea hae ea pele e bitsoa ‘Fetola Bophelo Ba Ka’. Eona e hatisitsoe e le bukana (booklet) ka selemo sa 2017. Buka ena e manolla litšiea tsa khoebo, likhothatso le koetliso ea bophelo.
Buka ea bobeli, ‘How can Basotho Move to the Next Level Economically’ ke eona e ketekoang. Bukeng ena, Mahonko o bua le Basotho ka litaba tsa matlafatso ea kholiso ea moruo. O hatella taba ea katleho limmarakeng tsa lehae, ekasitana le ho chesehela kholo ea moruo.
H’a bua ’mokeng oa litaba maobane o behile litaba tsa hae tjena; “Ha ho motho ea kileng a fumana phoso leha e le ’ngoe bukeng ena. E baloa ke batho ba rutehileng haholo le ba sa rutehang haholo; ba baholo le ba banyenyane. Sechaba sohle se bone buka ena e le bohlokoa ‘me re fumane taba ena e loketse ho ketekoa. Re bona ho lokeleha hore katleho ena e fihle libukeng tsa nalane. Buka ena batho ba e nyatsang ke ba sa batleng Sesotho hoba e ngotsoe ka Sesotho.” Mahonko o rialo.
Mahonko o hlahisa khau ea hae
Ho feta mona, katleho ea bobeli eo Mahonko a e ketekang ke khau eo a e abetsoeng moketeng oa likhau ho ananela seabo sa bacha kahara sechaba – (Basotho Youth Achievement Awards 2023).
Phano ea likhau e bile holong ea CRC, Katlehong, Maseru ka la 1 Phupu 2023. Mona Mahonko o hapile khau mokhahlelong oa ’Mampoli Litabeng tsa Sechaba (Community Champion Award).
“Sepheo se seng ke ho keteka khau ena; ha re hloleha ho keteka lintho tse hlokang ho ketekoa, ke utloa hoo ho baka ho sithabela hoa maikutlo. Re phela naheng eo lintho tse ntle li sa etsetsoeng lerata. Honajoale ke tlameha ho bitsa ’moka oa bo-ralitaba hore khau ea ka e tle e lemohuoe.” O li beha joalo.
Mahonko o re o na le liqholotso thekisong ea buka
H’a tsoela-pele o ile a fetisa liteboho tsa hae ho bahlophisi ba likhau. “Ke rata ho hoelehetsa ho ba hlophisitseng likhau; kea leboha ka ho hlokomela talenta, le ho khothaletsa matla ka kananelo ea lona.”
Leha ho le joalo, liqholotso tseo Mahonko a tobaneng le tsona ke mokhoa oa thekiso ea buka. O supa hore libaka tseo a neng a hopotse ho rekisa buka ho tsona kaha li le sephethe-phethe e le mabenkele a maholo, feela o re baokameli ba mabenkele a joalo, ha ba rate ho sebetsa le eena kaha a le khahlanong le boitšoaro ba bona ’marakeng oa Lesotho.
“Buka e fumaneha mabenkeleng a libuka, le hoja qholotso e le sekhahla sa bareki se fokolang moo. Ho feta mona ke sebetsa ka liotara, moo motho a ntetsetsang ho reka buka.” Mahonko o lihella likhala joalo.
