MOSALI KHOTLA KA POLAO EA MONN’AE OA LEPOLESA

MOSALI KHOTLA KA POLAO EA MONN’AE OA LEPOLESA

Ka Moipone Makhemeng

La 13 Phuptjane 2023

‘Masarisi Ralekuku, 33, (Rethabile Angelina Foulo) oa Ha Abia Maseru ha morena Khoabane Theko, o hlahile ka pele ho ‘maseterata oa Maseru Teboho Tšosane kajeno, a hlaha e le moqosuoa oa bobeli polaong ea molekane oa hae – Tau Ralekuku.

Lengolo la qoso le hlalosa ha baqosuoa ka la 26 Pherekhong 2023 ka morero le maikemisetso ba ile ba thunya le ho bolaea Tau Ralekuku a le khoebong ea hae, Ha Abia, Maseru. Moqosuoa oa pele, Taole Koma (41) oa Lehlakaneng, Ha Mothae o se a ile a hlaha lekhotleng ‘me a itefella beili.

Tšoaro ea ‘Masarisi e tla kamora hore sepolesa se phatlalatse foto ea hae ho marang-rang se hlalosa se ntse se ‘matla ka pelaello ea polao ea monna oa hae. Sepolesa se ile sa tlaleha ha ‘muelli oa hae a nehelane ka eena sepoleseng maobane.

Kamora ho balloa qoso, mofumahali Ralekuku o ile a tsebisoa litokelo tsa hae e leng ho ipatlela ‘muelli ea ratoang ke eena eo a tlang ho itefella eena kapa ho fuoa ‘muelli oa ‘muso. ‘Muelli ke eena ea tla mo kopela beili lekhotleng le phahameng.

Tlaleho ea sepolesa e supa hore ka la 26 Pherekhong 2023 ho ne ho fihle monna khoebong ea mofu Tau Ralekuku bosiu a ikhakantse eka ke moreki. Eitse ha a kena ka khoebong, a thunya mofu a balehela lefifing. O bonoe a kena koloing e neng e mo emetse kae-kae haufi le moo. Moqosuoa Taole o ile a tšoaroa ke Sepolesa ka la 28 Motšeanong 2023. ‘Melaelloa e mong o ntse a kene pooneng – Paramente Rantaoana oa Qacha’s Nek.

Ho sa le joalo, moqosuoa ‘Masarisi Ralekuku o tla emela nyeoe a le polokelong ea batšoaruoa ‘me o tla boela a hlaha khotla ka la 27 Phuptjane 2023.