MA-RASTA A TSEKA HO TSUBA MATEKOANE KA MOLAO KHOTLA

MA-RASTA A TSEKA HO TSUBA MATEKOANE KA MOLAO KHOTLA

Ka Moipone Makhemeng

La 31 Motšeanong 2023

Mokhatlo oa Rastafari United Front o hlahletse nyeoe Lekhotleng la Molao oa Motheo moo thapeli ea oona e kholo e leng ho tseka hore ’muso o lumelle tšebeliso ea matekoane ka molao lintlheng tsa borapeli, lihlahisoa tse fapaneng tse etsoang ka ‘ona ekasitana le ho lumelloa ho a lema.

Ho ea ka e mong oa litho tsa mokhatlo, Rasta Babatunde, mabaka a mangata ao ba reng setlama sena se sebelisoe ka bolokolohi. Babatunde o rapalalitse hore ntlha ea pele ke hore bona e le sechaba sa Rastafari ke batho ba moea empa ba iphumana ba khetholloa kahara naha ena.

Sena o re se bonahala moo molao oa motheo oa Lesotho o lumellang Mosotho e mong le e mong ho phela ka bolokolohi ka tumelo ea hae kapa moetlo empa o re bona ha ba na tokoloho ea ho phela bophelo ba bona ka bolokolohi kaha ba thibeloa ho tsuba khomo-ea-fatše eo e leng karolo ea borapeli ba bona.

“Setlama sena ntlheng ea semoea re se sebelisa ha re etsa meetlo ea rona haholo bakeng sa borapeli ba rona.

“Se sebetsa e le libano ebile e le Cup of Oneness among us, it unite us in spirit.” Babatunde o toboketsa joalo.

O boetse o supa hore ho tšoana feela le kerekeng tse ling ha li sebelisa joala e le veini kapa ho sebelisoa sakaramente lithapelong tsa balumeli bao.

Ho feta mona, Babatunde o bontša hore matekoane leha a entsoe tlolo ea molao, bona b’a tseba hore ke lijo, moriana ebile ke semela se hlahisang le lintho tse ngata ho kenyeletsa khoele, pampiri le oli ea makoloi. Ka hona ke thapeli ea bona hore Basotho ba lumelloe ho a lema ka molao kaha ebile e le setlama se ka nyollang moruo oa naha.

Ho sa le joalo naheng ea Afrika Boroa, batho ba lumelletsoe ho sebelisa matekoane malapeng a bona ho itlhabolla.

Ba boetse ba lumelletsoe ho a lema lirapeng tsa bona malapeng feela. Molao ona o tlile kamora hore monna oa Le-Rasta ebile e le leqoetha, Gareth Prince, le bo-mphato oa hae ba qose ‘muso Lekhotleng le Phahameng la Western Cape ba tseka ho tsuba matekoane ka bolokolohi. Ke moo lekhotla le phahameng le ileng la fumana hore thibelo ea batho ho sebelisa khomo-ea-fatše malapeng e hohlana le molao-oa-motheo. Nyeoe e oele ka 2017.

Kahlolo ena e bile ea tiisoa ke Lekhotla la Molao oa Motheo empa ‘muso o ile oa hlahlela nyeoe ea maipiletso khahlanong le kahlolo ena empa oa hloloa ke nyeoe.