MALOME VECTOR O PHETA MASA-A-KOKOMETSE
La 24 ‘Mesa 2023
Sebini sa Lesotho ‘minong oa Hip-Hop, Malome Vector eo lebitso la hae e leng Bokang ‘Moleli ho hlaha motseng oa Mangopeng, Roma, Maseru o lokollotse setlabolane se jereng masa-a-kokometse a supang ha mohiri oa hae oa mehleng, oa Afrika Boroa, Ambitiouz Entertainment a ne a mo entse sekepesele.
Pejana Vector o ile a khaola maqhama le mohiri a sa khotsofala. Beke tsa ho feta mohiri o ile a bonahala a fereletsa Vector ka majoe ho marang-rang, a re Vector o utsoitse pina ea kompone ea hae e bitsoang Ya Costa.
Pineng e ncha moo Vector a phetang masisa-pelo e bitsoa ‘Go Ahead’. Mona Malome Vector o ithoka ka tsela ena, ‘me ela-hloko hore pina e fetoletsoe Sesothong ke koranta ena:
Tsoela pele ho joetsa batho hore ke u tsoile fatše,
U bolelisa botsoa ba ka leha ke sebetsa ka thata,
U no mpha chelete hafeela u thabile,
Ha ke na letho ho rekela ngoan’a ka litlhoko,
Ha u bone hore ke lapile?
Ke fumana mehala kamehla,
Ho tsoa ho ‘m’e motsoali,
Le lelapa kaofela,
Hore ke lula ke sebetsa,
‘Me hohle pina tsa ka ba li letsa,
Motho ea reng ha ke etse saka oa nthetsa,
Nthoena kaofela e nkenyetsa poresha.
Ke re ke lula ke sebetsa,
‘Me hohle pina tsa ka ba li letsa,
Uena u mperelletse ekare ke sofa,
Polokelo ea ka ea banka e omme, e hlabise lihlong,
Karete e litlelaena ke ile lijong,
Feela ke sebetsa bosiu le motšeare,
Beke le beke ke bolaea lishou.
Ke sebetsa ka thata ke sa fumane letho,
Khoeli le khoeli ke ntša lihiti,
Ha ke u letsetsa ha u arabe mehala ea ka,
Nako eo u ntetsetsang ke ha u ntlhoka,
Empa ho lokile monna,
Ke ntse ke le ‘moja,
Ka tsohle tseo u li entseng oa li lefella,
Leha leeto lena le bile bosula.
