BA FAOTSENG MOTHO BA AHLOTSOE TSE NGATA TORONKONG
Ka moqolotsi oa rona
La 21 ‘Mesa 2023
Kajeno moahloli oa Lekhotla le Phahameng la Maseru, Tšeliso Mokoko, o lihile kahlolo khahlanong le banna ba bararo ba Ha Tšilonyane, Maseru, e leng Poloko Ramosothoane, Katiso Ramoreboli le Thapelo Tšekeli ba neng ba qosoa ka polao ea mofu Motlatsi Khoabane oa Ribaneng, Mafeteng ka ‘Mesa 2017 ekasitana le ho mo faola ba nka litapole tsa hae ba re ba ilo etsa moriana oa mahlohonolo ka tsona.
Ha a ba balla kahlolo, Moahloli Mokoko o itse o hlokometse hore baqosuoa esale ba hoehla chankaneng lilemo tse tšeletseng ho tloha ha ba tšoara ka la 30 Motšeanong 2017, ‘me a re lekhotla le tla ba mohau ho sheba ntlha ena kaha ha se molato oa bona hore ebe ba hoehlile nako e kaalo kaha ho ea ka molao oa motheo makhotla a lokela ho aba toka ka potlako.
Adv. Phooko le Adv. Lesutu ka nqane
Mokoko o itse ona ke mothati o boima nyeoeng ha ho fanoa ka kahlolo empa a re: “Ke shebile lintlha tse ‘maloa hore ke tlo fana ka kahlolo e joang ‘me ke tla ipapisa le maemo a hore sechaba se ikutloa joang ka tlolo ena ea molao ekasitana le ho talima maemo a baqosuoa.
“Ke hlokometse hore moqosuoa oa pele Poloko Ramosothoane o na le mosali le bana empa ho ea ka bopaki ke eena forose e rerileng polao ea mofu ka bokhopo bo tsotehang.
“Ke temoho ea Lekhotla hore bophelo ke tšiea ea bohloko ho batho bohle kaha ho amoha motho bophelo ho nka tsohle tsa bohlokoa ho eena.
“Ho ne ho le bohloko ha lelapa la mofu le boloka mor’a lona a se na makoalata. Leha akhente ea baqosuoa e bontšitse baqosuoa ba sa ruteha empa hoo ha ho bolele hore ba ke ke ba fumana kahlolo e boima bo lekanang le tlolo ea molao eo ba e entseng.
“Ka ho khetholoha moqosuoa oa boraro leha a amohetse molato empa ke eena ea neng a le kapele morerong ona a ba a nka litapole tsa mofu a li boloka.
“Leha e le hore baqosuoa ke banna ba phelang metseng ea mahae ba lumelang ho boloi empa lekhotla le lokela ho ba pitla ka kahlolo e lekanang le tlolo ea molao eo ba e entseng.
‘Ba rerile ‘moho polao ena; bonnete ba ne ntse ba na le monyetla oa ho fetola morero oa bokhopo bona ba bona empa ba itsoella-pele.
“Kahona ke liha kahlolo ena ke etse hloko hore leha ho ka ba le mohau empa lekhotla ha le ea lokela ho ikhelosa, empa le lokela ho fana ka kahlolo e bontšang kabo ea toka ho sechaba.” Ke moahloli Mokoko a liha nyeoe.
Khabareng moahloli o ile a liha kahlolo hore baqosuoa kaofela ba tla hoehla chankaneng lilemo tse 30 empa tse tšeletseng li tla hlakoloa kaha ba se ba li lutse toronkong ho tloha ba tšoeroe ka 2017. Mokoko a hlalosa hore joale ba tla hoehla lilemo tse 24 kaofela hoa bona.
Akhente Khosi Lesutu o ne a buella baqosuoa athe lehlakore la mofapa-hlooho le ne le terebeloa ke akhente Phooko.
