NATSOANE O KOPA KAHLOLO E BOBEBE

NATSOANE O KOPA KAHLOLO E BOBEBE

… O RE O BATLA HO EA TSAMAISA KHOEBO EA HAE

Ka Moipone Makhemeng

La 20 ‘Mesa 2023

Monna oa Ntlholohetsane, Mokhotlong, Lepota Natsoane eo maobane a fumanoeng a le molato oa ho bolaea mosali oa hae, ‘Malehasa Natsoane ka la 21 Motšeanong 2021 o hlahile kapele ho moahloli ‘Mabatšoeneng Hlaele kajeno a ikopela mohau hore lekhotla le mo fe kahlolo e bobebe.

Ha a teka kopo ea moqosuoa kapele ho moahloli Hlaele, leqoetha la ‘molai, Adv. Lintle Motšoehli o hlalositse ha ‘muelloa oa hae a ne a le tlasa tšusumetso ea khalefo ha a tla khakhatha mosali oa hae kaha mohatsa a ile a fihla lapeng ha bona hoseng ebile a nkha mothamahane.

A re joaloka monna oa Mosotho ea phelang lithabeng, tloaelo ke hore motho oa ‘m’e a fihle lapeng ka nako; ho pheha le ho etsa mesebetsi e meng ea lelapa e seng ho etsa se entsoeng ke mofu.

Ha a tsoela-pele Adv. Motšoehli, o kopetse ‘muelloa oa hae mohau ka le reng o na le bana ba bashemane ba babeli; e moholo o lilemo li 13, ha ea mo hlahlamang a le lilemo li 12. O supile hore ka bobeli ba tlasa tlhokomelo ea hae ho tloha ka ho lefshoa hoa thuto ea bona sekolong, lijo, liaparo joalo-joalo. Ho feta mona, o supile ha ‘muelloa oa hae e le rakhoebo ‘me e le eena feela ea e tsamaisang kahona e ka oela bosieong ba hae. O tobokelitse hape hore khoebo ena e na le basebetsi ba 34 ‘me ha e ka koaloa bao kaofela ba tla felloa ke mesebetsi ‘me sena se tlo ama maphelo a bona le malapa a mangata.

Leha ho le joalo, mochochisi oa mofapa-hlooho, mofumahali ‘Makamohelo Mofilikoane o kopile moahloli Hlaele ho pitla moqosuoa ka kahlolo e boima kaha a bontšitse hore polao ke tlolo ea molao e kholo ka ho fetisisa. A lotomanya hore moqosuoa o tsekisitse mofu tokelo ea ho holisa bana ba hae le ho ba fa lerato hofihlela ba phuruselitse. A re o boetse o timme mofu monyetla oa ho ba le beng ka eena empa eena a tla ‘ne a be le ba hae ha a lokolloa litlamong.

Ha a tsoela-pele, o tekile kapele ho lekhotla hore moqosuoa e ne e le motho eo mofu a neng a mo tšepile bophelong ba hae leha e le eena moetsi oa ketso ena ea polao. Ha a fera lehlakore la bochochisi o teketse lekhotla hore polao ke tlolo ea molao e tebileng ‘me kahlolo e lokela ho lekana le boima ba tlolo ea molao.

Ho sa le joalo, moahloli Hlaele ha a lihella likhala o hlaloselitse moqosuoa hore hosane ka hora ea borobong ha e fetile ka metsotso e mashome a mararo a ba le lekhotleng ho tla utloa kahlolo ea hae.