Leihlo la Basotho
La 19 ‘Mesa 2023
Monna oa Ntlholohetsane, Mokhotlong, Lepota Natsoane ea neng a qosoa ka ho baka lefu la mofumahali oa hae ‘Malehasa Natsoane ka la 21 Motšeanong 2021 o fumanoe a le molato ke moahloli ‘Mabatšoeng Hlaele oa Lekhotla le Phahameng, Maseru kajeno.
Tebello ke hore hosane ‘muelli oa ‘molai, Adv. Lintle Motšoehli o tla tataisa ‘muelloa oa hae ho ikopela mohau hore lekhotla le mo shebe ka mohau le bebofatse kahlolo eo le tla mo fa eona toronkong.
Moahloli Hlaele o bile a hlakola beile ea Natsoane ‘me ho tloha kajeno o il’o robala ka banneng.
Lekhotla le fumane ka mapaki a ileng a tekoa hore efeela moqosuoa a ile a khakhatha mosali oa hae ‘me a baka lefu la hae.
Ho sa le joalo, nakong ea ho khakhatha hoa nyeoe Adv. Motšoehli o ne a hanyetsa hore Natsoane o bakile lefu la mosali oa hae ka ho mo khakhatha. Khang ea hae e bile hore mohla tsatsi leo moqosuoa le mosali oa hae ba ile ba qabana ‘me eaba Natsoane o lelekisa mosali ea ileng a leka ho baleha.
Adv. Lintle Mots’oehli, ‘muelli oa Natsoane [Foto The Post]
Ke moo monghali Natsoane a ileng a batla hore mosali a mo ise moo a reng ho ne ho e-na le mokete empa a fumana ho se matšoao a hore mokete o ne o le teng sebakeng seo. Ke moo qoaketsano e ileng ea tlola eaba mofu oa baleha ha monn’ae a tla mo lelekisa. Ke khang ea Adv. Motšoehli ha a kalla nyeoe ena.
Kamora ketsahalo ena, moqosuoa o ne a bolelle ba lelapa la bohoeng hore morali oa bona o ile a oela keiting, eaba lejoe le ea mo lematsa. Se ileng sa makatsa moahloli Hlaele ke hore moqosuoa o ile a betsa hlanaphetho a re mosali oa hae o oele sebakeng se seng se secha nakong eo a mo lelekisang – a se a sa bue ka hore o oele keiting.
Lekhotla le bile la fumana hore kamor’a ho khakhatha mosali oa hae Natsoane o ile a mo isa sepetlele empa ka bomali-mabe eaba o felloa ke bophelo.
Kahlolo ena e tla kamora hore moahloli Hlaele a bontše hore o batla ho etela sebaka seo Natsoane a neng a re mofu o oele teng e e ho ikholisa hore na motho ha a ka oela sebakeng se joala na a ka shoa.
