‘MOHLOLA-A-LI-ETSA’ O KOPA BEILE
Ka Moqolotsi oa rona
La 7 ‘Mesa 2023
Monna oa Matsoatlareng, Maseru eo mapolesa a reng ke mohlola-a-li-etsa, Lehlohonolo Selate (42) ea ileng a lokolloa ka beile ka Mantaha empa a tšoara hang-hang kamora ho lokolloa o boetse o batla hore lekhotla la ‘maseterata le mo lokolle ka beile empa bochochisi le sepolesa ba hanyetsa beile ea hae.
Kopo ea beile ea Selate e ne e mametsoe ke ‘maseterata oa Maseru, Nthabiseng Moopisa maobane ‘me e bile likhang tse boima ha mapolesa a teka mabaka a khanyetso hore Selate a lokolloe ka beile hape.
Monna enoa o qosoa ka hore ke eena forose nyeoeng ea ba qosoang ka ho utsoa chelete ea ‘muso e kaalo ka M50 milone ka 2021. Ho feta mona, ha sepolesa se mo qhautsa ka Mantaha kamora ho fuoa beile o boetse a busetsoa khotla a qosoa ka ho honya ka bomenemene chelete ea Standard Lesotho Bank eo sepolesa se reng o ne a thusi balotsana; Omega Ntsoele le Lisemelo Tšoaeli ho fuoa mokitlane oa M460 000.00 ke banka.
Maletsunyane Braai Festival
Sepolesa se re Selate ea neng a sebetsa bankeng eo lipakeng tsa Phuptjane 2018 le Motšeanong 2019 o ile a pheha mafosisa a hore bao ke basebetsi ba k’hamphani e bitsoang Limomonane Logistics feela ho se joalo. Bala litaba tseo ka botlalo mona https://t.ly/yZ5O.
Bochochisi maobane bo ile ba ema khahlanong le kopo ea hore Selate a lokolloe ka beili ka le reng o na le letoto la linyeoe tse ngata tseo a tobaneng le tsona ‘me mapolesa a re o ile a ba sokolisa h’a lokela ho hlaha lekhotleng nakong ea ho feta.
Paki ea pele e tekileng bopaki ba khanyetso ea beile e bile lepolesa Penane Lesaoana ho hlaha sepoleseng sa Ntlo-Kholo Maseru lefapheng la Toantšo ea Boqhekanyetsi le Bomenemene.
Eena o teketse lekhotla hore ha ba na tšepo hore moqosuoa a ka khutlela khotla ha a ka lokolloa ka beile kaha e ile ea e-ba boriki ho fumaneha ho tloha ka qoso ea 2018 le ea 2021. Ntle ho mona, o hlaloselitse lekhotla hore moqosuoa ha a ntse a le ka chankaneng o ile a ba le boitšoaro bo sa amoheleheng moo a ileng a fumanoa a na le mohala oa thekeng ‘me a ba a tlosoa chankaneng e tlaase, a isoa chankaneng e kholo.
Ka mokhoa o tšoanang, paki ea bobeli, Sergeant Kotsi, o hatisitse holim’a lintlha tsa paki ea pele hore ho ile hoa ba boima ho fumana moqosuoa liqosong tse ling tse fetileng kaha ho ne ho sa tsejoe moo a teng.
O totobalitse hore ba bile ba sebelisa sehlopha sa bo-ramahlale ho phopholetsa moo a neng a ipatile. Ke moo ka tšebelisano-‘moho le bo-ramahlale ba sebetsang le bona Afrikoa Boroa ba ileng ba fumana hore o phela libakeng tse fapaneng hona naheng eo.
O re ba ile ba etsa matsapa ‘ohle ho mo fumana ‘me khabareng ba ile ba mo tšoara ka maraba ao ba neng ba mo lohetse ‘ona karajeng e ‘ngoe Maputsoe ha a ne a tla Lesotho, a bile a tšela le nokeng ea Mohokare ho tla hae.
Ho sa le joalo, ‘muelli oa moqosuoa, Advocate Rethabile Setlojoane o beile ka pele ho lipaki hore li ne li emetse hore moqosuoa a lokolloe ka Mantaha ebe ba mo qhautsa hape. “Ke beha ka pele ho uena hore nakong eo u neng u tšoara moqosuoa, u ile oa re ho eena: ‘U nahana hore u bohlale, ke ka hoo e tla re ha u lokolloa ebe re u tšoare ka qoso e ‘ngoe e fapaneng.
Re batla u be u sitoe ho patala akhentenyana ena e u buellang.” Ana ke mantsoe a ‘muelli oa moqosuoa ha a teka kapela paki ea pele. Ha a tsoelapele o bontšitse hore le linyooe tseo moqosuoa a tobaneng le tsona ha ba na tsebo e felletseng hore na li hakae.
Advocate Setlojoane, o boetse o bontšitse hore moqosuoa o tšetse le nokeng Maputsoe kaha pasa ea hae e ne e felletsoe ke nako. A re moqosuoa o tšetse hole le borokho pela motse moo a neng a na le monyetla oa hore a ka tsamaea le kahara motse e seng moo karajeng joalokaha paki e ‘ngoe Sergeant Kotsi a hlalositse hore ba ne ba mo lohetse mano a hore ba mo pitle hona teng.
Nyeoe e tla boela e tsoela-pele ka Labobeli la la 11 ‘Mesa 2023.
