MPO O FUMANOA A LE MOLATO OA THUNYA SA LESHALA
Ka Moipone Makhemeng
La 30 Tlhakubele 2023
Monna oa Mosotho, Motse Mpo (30) oa Ha Mpo, Qeme, Maseru tlasa morena oa sehlooho oa Matsieng, Morena Seeiso Bereng Seeiso, o hlahile ka pele ho ‘Maseterata oa Maseru, Nthabiseng Moopisa maobane, moo teng a tjametsoeng ke qoso ea ho ba le sethunya ka thoko ho molao hammoho le mahlahahlela a sona.
Ho utloahala ha moqosuoa ka la 28 Hlakubele 2023, a ile a reka ka maikemisetso le ka thoko ho molao sethunya sa moetso oa .22 Special se neng se hlahletse kulo e le ’ngoe se hlakotsoe linomoro ‘me se se na mangolo.
Lefokisi la Sepolesa Detective Police Constable Mahase oa motebo oa sepolesa sa Qeme o boleletse lekhotla hore o ile a etela Mpo moo teng a ileng a fumana a na le bistolo e boletsoeng ‘me a mo batla lengolo la eona empa moqosuoa o ile a hloleha ho nehelana ka lona. Ha morao o ile a mo balla litokelo tsa hae a nt’o mo tšoara a mo beha kapele ho lekhotla.
Kamora ho balloa qoso ke moqosuoa o ile a ipolela a le molato ‘me ’Maseterata Moopisa o ile a bontša hore o fumana hore ke la mantlha a etsa tlolo ea molao empa leha ho le joalo toka e loketse ho ajoa. Ka hoo, o ile a mo fa kotlo ea ho theohela teronkong lilemo tse tharo kapa ho itefella M3000.
