BA LIFEME BA RE MATEKANE A PHETHISE LITŠEPISO
… BA BATLA M4000 EA MOPUTSO
Ka Moipone Makhemeng
La 29 Tlhakubele 2023
Bekeng e tlang basebetsi ba lifeme le mesebetsing e meng e ikemetseng ba lebeletse ka tšepo hore ha kasete ea nyollo ea meputso e phatlalatsoa ba tlo thaba kaha ba lebeletse hore tona-kholo Sam Matekane a phethahatse tšepiso ea hae ea ho ba fumantša meputso e phelisang eo a neng a e etse boiketong ba likhetho.
Puisanong le motlatsi oa mongoli-kakaretso oa mokhatlo oa basebetsi ba lifeme, National Clothing Textile and Allied Workers Union (NACTWU)), monghali Tšepang ‘Nyaka-Nyaka’ Makakole, o totobalitse ha tonakholo Matekane nakong ea boiketo ba likhetho ngoahola a ile a tšepisa basebetsi ba lifeme hore pusong ea hae basebetsi ba tla nyolleloa meputso hore e-be M4000 ka khoeli.
Makakole o itse hajoale motho ea kholang ka holimo-limo o khola M2500 ka hona ba lebeletse hore mokholo o joalo o nyolohele ho M4000.
“Basebetsi ba tšepisitsoe M4000; akere ntate Matekane ha a ntse a potoloha a iketa lifemeng o itse o tlo ba fa basebetsi M4000. Haeba ho se joalo, basebetsi ba batla nyollo ea 20% ha kasete e tsoa bekeng e tlang.” Makokole o rialo.
Ha a tsoelapele, o boetse a bontša hore nakong ea joale lintho li nyolohile haholo ka hona chelete e kaalo ha ho seo e se etsang kaha e le nyane. O re tebello ea bona ke hore bekeng e tlang ha kasete e phatlalatsoa ba lebeletse nyollo e toma.
Ho sa le joalo, Leihlo la Basotho le batlile maikutlo ho raliphatlalatso oa tona-kholo, monghali Thapelo Mabote ea supileng hore ‘muso o ntse o sebeletsa ho bona hore batho bohle ba fumana meputso e phelisang joalokaha monghali Matekane a ile a tšepisa.
Leha ho le joalo, Mabote o itse ha se ‘nete hore tona-kholo e tšepisitse basebetsi moputso oa M4000 empa a re Matekane o tšepisitse moputso o phelisang a sa bolele sekepele sena seo basebetsi ba reng ke M4000.
Mabote a phethela ka hore litaba tsa kasete li tsamaisoa ke letona le ikarabellang khirong, kahona a re ha a na tsebo mabapi le hore na taba ea nyollo e tla kena tšebetsong neng. A re hore meputso e nyolloe ho ipapisisoa le maemo a moruo.
