MOLELEKI O LATOLA HO EA MACHABENG
La 29 Tlhakubele 2023
Moetapele oa Alliance of Democrats (AD), Monyane Moleleki o latotse bosehla mabare-bare a hore ‘muso oa tona-kholo Sam Matekane o tlo mo romela ho ea sebetsa e le moemeli oa Lesotho naheng ea India.
‘Mokeng oa bo-ralitaba o neng o tšoaretsoe liofising tsa AD, Mohalalitoe, Maseru kajeno, Mokola o phubutse menyenyetsi eo, le ho e tšela ka metsi a batang. O itse o utloile le liea-le-moea tse ling li se ntse li hasa kaliana eo ka tsela e mo hlomphollang le ho mo hobosa e le motho.
Moleleki oa hlalosa: “Ha ho etsahale hore Letona la Machabeng le ka qoqa kapa la tlaleha kae kapa kae khiro ea baemeli ba Lesotho machabeng, naha e itseng a e-s’o amohele kopo ea ho amoheloa ke naha eo ebe u se u re u hirile motho ea joalo.
“Nthoena ke kaliana feela, ke re matsollo-peli-mapata-masene a reretsoeng ho ferekanya Ma-AD hobane feela re ea likhethong. Ha ho ntho e joalo; ha ho India eo ke eang ho eona. Ke tebello ea ka hore litaba tse nkamang ke le moetapele oa AD litaba tsa ka li atameloe tlhompho. Nthoena ke pherekano feela e reretsoeng ho ferekanya litho tsa AD.”
Mokola o hlalositse methati ea ho romela mohlanka linaheng tsa machaba joana:
“Ha ho nepahetse, letona le tlameha ho etsa kopo ea thomo ea motho machabeng ho tona-kholo, kamora moo kopo eo e tla isoa lekhotleng la matona e seka-sekoe. Ha lekhotla la matona le ananetse lebitso la motho ea joalo.
Kamora moo, Hlooho ea naha e tla tsebisoa ‘me mothati oa ho qetela e-ba hore naha e amehang e ea tsebisoa ka motho ea joalo, ‘me le eona e tlameha ho ananela lebitso la moemeli ea joalo kamora ho ikholisa hore motho eo ha a na litlolo tsa molao.
“Ke rata ho tsebisa Ma-AD hore ha ke ee mono, nke ke ka siea lekhotla la heso, nke ke ka rekisa lekhotla lena ka paperback hobane e se e le teng paper back. Ha ho na moo ke eang mona. Ha ke na siea lekhotla la heso le le tlokotsing le keneletsoe ke lira le bathetsi ba e keneletse ka paper back.” O rialo Moleleki.
