‘MUELLI O RE MOTOKO A QOSOE A LE MONG
Ka Moipone Makhemeng
La 28 Tlhakubele 2023
Nyeoe e ntseng e tsoelapele Lekhotleng la ‘Maseterata, Maseru, e mametsoeng ke ‘Maseterata Peter Murenzi moo ho qosoang Nokuleleko Zaly, Thabo Motoko le ba bang ba 12 ka tlolo ea molao ea boqhekanyetsi, bosholu ba chelete le tjotjo e tla boela e khakhatha hape ka la 2 ‘Mesa 2023.
Moqosuoa oa pele le ba bang ka tatellano ba eme ka tsela ena: Nokululeko Zaly, Baba Ketso, ‘Makhotso Mahosi, Thabo Motoko, Setofolo Ramarou, GEE. M Construction Pty Ltd, Kypros Engineering Pty Ltd, Lefu Manyokole, Mooka Namoli, Chipo Hulela, Maru-a-pula Mining and Cinstruction Pty Ltd, Botselo Pty Ltd, Pule Thoahlane le Keketso Makoko.
Thabo Motoko [foto – gov.ls]
Maobane lekhotleng lena ‘muelli oa Thabo Motoko eo e leng Mongoli e Moholo oa Lekala la Machabeng, Adv. Christopher Lephuthing o entse kopo ea hore lekhotla le hlomphehang le lokela ho ntša ‘muelloa oa hae ho ba bang, ‘me a tle a qosoe ka thoko a le mong.
O supile hore lebaka la seo ke hobane h’a e-s’o fuoe tokete hore a ithute likateng tsa liqoso tseo muelloa oa hae a qosoang ka tsona. O boetse a bontša tlhokahalo ea lipatlisiso mabapi le ho hlahloba hore paki e se ke ea etseletsa moqosuoa ka morero oa ho mo senya lebitso feela.
Ha a tsoela-pele o supile ha taba ea ho se fuoe tokete e le eona e etsang hore liakhente li fumane li se li thulana le liqoso tse ling thoso.
Ho sa le joalo, mochochisi oa nyeoe ena, Adv. ‘Mamongonyo Baasi o ile a bontša hore kopo ea semmuso e ile ea hlahleloa lebitsong la moqosuoa Motoko, eo sepheo e leng ho phephetsa qeto ea ofisi ea Mochochisi e Moholo oa ‘Muso. Baasi o ile a re lekhotla la ‘Maseterata ha se sebaka se nepahetseng mabapi le kopo e joalo kaha kopo e joalo e ka be e lebisitsoe lekhotleng la molao oa motheo.
