O QOSOA KA HO BOLAEA MOTHO KA LEBETLELA QACHA’S NEK
Ka Moipone Makhemeng
La 23.3.2023
Kajeno Lekhotleng le Phahameng, Maseru kapele ho moahloli Tšeliso Mokoko, ho hlahile mohlankana oa Tereseng, Qacha’s Nek , Dumisani Mofihlo (25) ka qoso ea polao ea motho ka maikemisetso ka selemo sa 2018. Moqosuoa o qosoa ka ho tlola molao oa karolo ea 40 (2) (2) ea lethathamo la liqoso. Moqosuoa o ile a itlhalosa a se na molato mabapi le qoso e boletsoeng.
Mochochisi nyeoeng ena e bile Adv.Tšeliso Fuma ha ‘muelli oa moqosuoa e le Adv. Teboho Tšehisa.
Bopaking bo tekiloeng kapele ho lekhotla ke paki ea pele, monghali Thethi Fasi o bontšitse ha moqosuoa ka la 22 Tšitoe 2018 a ile a hlasela mofu Atang Makhatatso a mo khakhatha ka lebetlela. Paki e re e ile ea leka ho tšoara moqosuoa le ho namola ‘me mofu le eena a leka ho itoanela ka litebele. Paki e re e ile ea oela fatše ha Atang a tla baleha moqosuoa.
H’a tsoela-pele o hlaloselitse lekhotla hore moqosuoa o ile a lelekisa phofu ea hae joalo ho fihla mabitleng moo e itseng ha a lokela ho mo tšoara eo a baleha empa ka bomali-mabe a oela ka khohloaneng.
O hlalosa ha moqosuoa a ile a mo khakhathela moo ka lebetlela. Paki e re mofu o ne a sa nka letho leo e ka bang sebetsa nakong eo.
Khabareng paki e re ho na le monna e mong ea ileng a fihla ‘me ba leka ho kakasa lehlatsipa ho le isa motseng. Leha ho le joalo, paki e re mofu o ile a hoelehetsa ka seboko moo a neng a rapalletse teng ke moo ho ileng hoa utloahala moqosuoa a ntša puo e reng: “Hele! Satane ee e entse e phela banna!” Ka ho cho joalo a khutlela moo mofu a neng a rapalletse ho mo qetela ‘me paki e itse e ile ea khetha ho tsamaea kaha eo a ne a se a sa thibehe ‘me a re bopaki ba hae bo fella moo.
Ho boetse ho ile hoa ema paki ea bobeli khahlanong le moqosuoa, e leng Tumelo Mohoma (22) oa hona Qacha’s Nek. Eena o hlaloselitse lekhotla hore o ne a tsoa ‘shopong’ le e mong Refiloe ha ba fumana kepisi, mohala oa thekeng le baki tseo a ileng a tseba hore ke tsa mofu hamorao hore a li hlahlobe.
Ho sa le joalo, paki ea bobeli e re ho fihlile e mong ea bitsoang Thapelo ea ileng a ba tsebisa hore ho fetile batho ba babeli ba neng ba loana lehoja a sa ka a tseba na ke bo-mang.
O re ba ile ba ea ‘moho ho ea bona se etsahalang ‘me pele ba tlola totomanyana ba ile ba utloa ho lumaela hoa motho ba nt’o leba teng moo ba ileng ba fumana mofu a rapalletse fatše a le maqeba a tšosang. Paki e re lehlatsipa le ile la hlalosa hore ke Dumisani ke eena ea mo lemalitseng. O re moo ba ntseng ba leka ho isa mofu hae, Dumisani o ile a fihla a le mahlo a ntoa ‘me a tsoelapele ho khakhatha mofu.
Ho ea ka tlaleho ea paki ena, batsoali ba mofu le mofumahali ba ile ba fihla ‘me lehlatsipa le ile la potlakisetsoa sepetlele Machabeng, Qacha’s Nek.
Mochochisi o boetse a teka kapele ho lekhotla tlhaloso e fanoeng ke ‘me’ oa mofu e hlalositseng hore kamorao hore ba fihle sepetlele mofu a hlatsuoe maqeba o ile a rokoa maqeba a mararo hloohong, hoa boela hoa rokoa a mabeli setsoeng ‘me ha tšebetso ea baoki e felella lehlatsipa le ile la hemela tlaase qetellong la hlokahala.
Lekhotla le ile la nka khefutso kaha lefokisi le neng le lebeletsoe ho tla fana ka bopaki le ne le e-‘so fihle.
