RFP E KETEKA SELEMO E THEHILOE
Ka Moipone Makhemeng
La 23 Tlhakubele 2023
Mokha oa Revolution for Prosperity (RFP) maobane o ketekile selemo sa pele o thehiloe kaha o ne o phatlalatsoe ka molao e le mokha ka la 22 Tlhakubele 2022. Mokha ona o ne o thakholoe ke moetapele Mohlomphehi Ntsokoane Samuel Matekane eo kamora likhetho tsa Mphalane 2022 e bileng tona-kholo.
E le ho tšoaea letsatsi la tsoalo ea mokha ona, balateli ba ile ba bokana liofising tsa mokha Mpilo Boutique Hotel, Maseru. Ha ba tloha moo, ba ile ba potoloha toropo ea Maseru ka makoloi le lithuthuthu ba etsa menyakoe. Ka ho khetholoha RFP e thabetse katleho e kholo ea ho hapa mabatooa a mangata likhethong tsa ngoahola empa e na le likhoeli tse supileng feela e thehiloe.
Litho tsa mokha oa RFP
Sam Matekane o ts'etleha puo
Nthomeng Majara
Litho tsa mokha oa RFP
Litho tsa mokha oa RFP
Litho tsa mokha oa RFP
Litho tsa mokha oa RFP
Litho tsa mokha oa RFP
Litho tsa mokha oa RFP
Litho tsa mokha oa RFP
RFP e ile ea fumana matla le pele moetapele oa eona a ka etsa seboka sa bo-ralitaba moo a neng a phatlalatse motheo oa eona ngoahola ka khoeli eona e holimo ‘me ea fumana katleho e kholo likhethong tsa naha.
Moketeng oa maobane, har’a libui e bile letona la Puso ea Libaka le Borena, Lekala la Lehae le Sepolesa, mohlomphehi Lebona Lephema. Puong ea hae Lephema o bontšitse likatleho tseo mokha o seng o li fihletse pusong ea oona ka selemo feela o busa ‘me hara tsona a supa temo eo ba ileng ba e tšepisa sechaba.
Ha a tsoela-pele Lephema, o ile a hlalosa hore bona ke ‘muso o phethahatsang litšepiso ‘me lilemo tse hlano tsa pele li tla fela tema e bonahala; tšebetso e tlil’o ba kholo haholo.
Ho sa le joalo, motlatsi oa tona-kholo Mohlomphehi Nthomeng Majara o ile a fana ka puo moo a ileng a leboha moetapele oa hae ka ho mo atamela ho theheng mokha ona e le ho ntšetsa Lesotho pele. O ile a fana ka khothatso ho balateli ba mokha hore ba se nyahame ha ba ntse ba thulana le liqholotso kaha e le tsona tse holisang batho hobane nako e tlang ha ba thulana le tsona ba se ba li otla ka lipeta feela.
Mohlomphehi Matekane puong ea hae, o ile a leboha Basotho ka ho ba le tšepo ho eena. A supa hore ke hona lintlafatso li ntseng li tlo etsahala ka hara naha. O ile a bont’sa hore ba ile ba ntša literekere ho lema poone ‘me hajoale ba letšolong la ho kenya koro mobung. A re bona ke ‘muso o phethahatsang litšepiso tsa oona.
