VCL E THAKHOLA SETLA-BOCHA
Ka Moipone Makhemeng
La 12 Mphalane 2023
K’hamphani ea mehala, Vodacom Lesotho maobane e thakhotse sehlahisoa se secha se bitsoang Vodacom One Connect. Setla-bocha sena se fumaneha ka tsela ea Application (App) ho Google Play Store le App Store.
VCL e re e hlahisitse molelloa ona ho tla akofisa khokahanyo likhoebong esita le mekhatlong e ikemetseng. Sehlahisoa se fana ka phihlello e potlakileng e bonolo ‘me se tlo sebetsa joalo ka fono ea fatše empa sona se sebelisa marang-rang joaloka ka fono ea letsoho.
Ho likhoebo tse batlang ho sebelisa sehlahisoa sena bakeng sa ho letsa, khoebo o lokela ho reka ‘sefara’ (server) hammoho le komporo. Leha ho le joalo, ho boetse ho fanoa ka monyetla hore batho ba ka fumana (download) App ena ho Play Store kapa App Store. Mona motho ha a hloke komporo kapa sefara o tla itšebelisetsa App ea hae fonong ka tsela e tloahelehileng. Tabeng ea ho letsa, App e tlo tseba ho letsetsa linomoro tsohle kahara naha e leng tse qalang ka 5, 6 kapa 2. Ho feta mona e tla tseba ho letsetsa linomorong tsa ka ntle ho naha.
Ho ea ka mookameli oa tsa khoebo Vodacom, Puseletso Putsoane, Vodacom One Connect e na le makhabane a ikhethileng. Basebelisi ba tlo atleha ho tšoara likopano ka marang-rang, ho letsetsa mehala e tloahelehileng ea fatše ka litjeo tse bobebe hammoho le ho letsa. App ena ebile e sebetsa le mehaleng ea letsoho le likomporong ka mefuta eohle.
Puseletso Putsoane
Putsoane oa hlalosa: “Hona moo ho App ea Vodacom One Connect, u ka etsa ‘li-chats oa bua le batho joaloka ‘Microsoft Teams’. Taba e monate ke hore u ka sebelisa Vodacom One Connect hlohle; e leng hore u tla bo kakatletse ofisi ka matsohong. Ho feta mona, motho a ka tseba ho sebetsa a le lapeng.” Putsoane o rialo.
O phethetse ka hore Vodacom One Connect e tla ka mekhoa e ‘meli e leng Vodacom One Connect Essential (e qalang) ka theko ea M99 ka khoeli le Vodacom One Connect Premium (e ka holimo-limo) eo litjeo e leng M190 ka khoeli. Lihlahisoa tsena li se ntse li le teng ho Play Store le le App Store.
Ho sa le joalo, Mookameli oa Phethahatso Vodacom Lesotho, Mohale Ralebitso, o bontšitse hore sehlahisa sena se tlo bula menyetla hore Basotho ba nyolle moruo oa Lesotho tšebeliso ea marang-rang, ekaba litabeng tsa temo, litšebeletso tsa bophelo, mekhatlong e ikemetseng esitana le mafapha a polokeho ea sechaba le tšireletso.
Ralebitso o hlalositse hore sepheo sa bona ke ho thusa ho theola litjeo le ho nyolla tlhahiso likhoebong. O boetse a thatiselletsa holima litaba tsa tšireletso ea marang-rang khahlanong le botlokotsebe ba marang-rang (cyber crime). O bontšitse hore bona e le Vodacom ba fana ka tšireletso e joalo.
Putsoane o re batho ba ka sebelisa Vodacom One Connect ba etsa mosebetsi ba le malapeng
Ralebitso ha a toboketsa taba ea tšireletso o hlokomelisitse litsotsi kapa likhukhuni tsa marang-rang hore li tsebe li thulane le maemo a phahameng ka ho fetisisa tšireletsong ea basebelisi ba setla-bocha sena.
Leha ho le joalo, o hlalositse hore seo ha se bolele hore bareki ha ba lokela ho sireletsa tikoloho ea bona hobane hafeela likhukhuni li khona ho fihlella thepa ea bona li ka ba senyetsa.
Hona litabeng tsa botlokotsebe ka marang-rang, Mookameli lefapheng la khoebo, Lisemelo Ramafikeng o bontšitse hore e le ba Vodacom ba na le sehlopha sa tšireletso ea marang-rang (cyber security) eo ba ka fanang ka litšebeletso tsa eona ho likhoebo ka mefuta ea tsona.
Lisemelo Ramafikeng
“Ha u ntse u sebelisa thekenoloji, re na le likhukhuni tse sebelisang thekenoloji hore li tsebe ho qhekanyetsa khoebo ea hau, e leng ‘cyber hacking’. Mono ho na le cyber security ka nqane e tla u thusa hore likhukhuni li se kene.” Ramafikeng o hlalosa joalo.
Ha a fera o itse tšebeletso e ‘ngoe le e ‘ngoe eo ba nang le eona malebana le litaba tsena ba ka fana ka eona ho likhoebo.
