SEBOHOLI SA PCFM MATJALENG
Ka Moipone Makhemeng
La 19 Motšeanong 2023
Seboholi sa People’s Choice FM, Bafokeng Ramoseeli ea tummeng ka lebitso la DJ Bootz o matjaleng.
Ho ea ka menyenyetsi ea litaba, Bootz ho utloahala a buile mantsoe a sa khotsofatsang bookameli moo a neng a bontša ho se khotsofale hoa hae ka litaba tsa mosebetsi.
Ho hlahella hore mookameli oa seea-le-moea, Khauta Mpeqa o ile a nkela DJ Bootz tulong ea khalemo moo qeto e bileng hore a behelloe ka thoko ho mosebetsi, kamora ho fumanoa a le molato oa ho bua hampe ka bookameli.
Leihlo la Sechaba le buisane le DJ Bootz ho mo nonya maikutlo tabeng ena: “Ke ‘nete ke behelletsoe ka thoko ho mosebetsi empa ke masoabi ha ke na ntša maikutlo kaha taba ena e matsohong a ‘muelli oa ka ‘me ka boikokobetso ke tla sitoa ho araba. Mohlomong hamorao ke tla ntša polelo ka litaba tsena ‘me eona e tla manehoa leboteng la ka la Facebook.” Bootz o araba joalo.
Ho sa le joalo, koranta e buisane le mookameli oa PCFM, Khauta Mpeqa, a bontša hore a ke ke a bua letho le amanang le DJ Bootz kaha litaba tseo ke litaba tsa mosebetsing tse kahare tseo a sa tlamehang ho bua ka tsona ho bophatlalatsi.
“Nke ke ka lumela ho bua ka litaba tsa motho tsa mosebetsing ebe li se ntse li ea likoranteng. Ebile ha re hle re e koale hona mona; ha ke tlo bua le uena ka litaba tseno tsa Bafokeng.
“Ke nka ho sa nepahala ho bua ka litaba tsa motho tse kahare ebe re se ntse re bua ka tsona. Ho na le lintho tseo e leng litaba, ‘me ena ke utloa ho se taba mona.” Mpeqa o araba moqolotsi joalo.
