SADC E HULA MASOLE MOZAMBIQUE
Ka moqolotsi oa rona
La 11 Hlakola 2024
Mokhatlo oa Kopano ea Linaha tsa Ntlafatso ea Moruo Afrika e ka Boroa (Southern African Development Community – SADC) o re o qalile ho hula masole a lebotho la oona la SADC Mission in Mozambique (SAMIM). Lebotho lena le bopiloe ka masole a linaha tse latelang: Angola, Botswana, Democratic Republic of Congo, Lesotho, Malawi, Mozambique, Namibia, South Africa, United Republic of Tanzania le Zambia
SADC e ile ea romela masole Mozambique ka la 18 Phupu 2021 ka sepheo sa ho thusa ho loantša marabele a neng a tsoile taolong a hapile litoropo tse kholo porofinsing ea Cabo Delgado joaloaka Mocímboa da Praia. Masole a Rwanda a ne a fihli pele ho a SADC ‘me a amoha marabele toropo ea Mocímboa da Praia.
Masole a SADC ho hlaha Afrika Boroa a patorola toropo ea Mozambique
Polelo ea SADC e phatlalalitsoeng ka la 28 Pherekhong 2024 e baleha tjena: “Re tla hopola qeto e ileng ea fihleloa ke lihlooho tsa linaha le mebuso sebokeng se ikhethang Luanda, Angola ka la 17 Phato 2023. Qeto e bile ho hula masole Mozambique ka la 15 Phupu 2024. Seboka se ile sa laela bolaoli ba SAMIM ho qalella ho hula masole ka Tšitoe 2023 ‘me ho phetheloe khulo ka botlalo ka la 15 Phupu 2024.
Leha maemo a le tjena, SADC e re e etse hloko hore marabele a ntse a tsoela-pele ho hlorisa sechaba, basali le bana literekeng tse ling Cabo Delgado.
“Mongoli e Moholo o teketsoe litlaleho ke bolaoli ba SAMIM ka liqholotso le tseo mabotho a ithutileng tsona hammoho le ho fana ka likhothaletso bakeng sa matšolo a tla latela kamoso. Lebotho la SADC le lakatsa ho siea maemo a tsitsitse molemong oa polokeho ea sechaba sa Cabo Delgado.” Polelo ea SADC e rialo.
Ntoa e qalile ha sehlotšoana sa balumeli ba Islam se nka libetsa ho loantša ‘muso ho tseka tse latelang: tlhokahalo ea mosebetsi, bofuma, litšebeletso tse bosula ‘musong, bobolu le lirashoa tsa naha tse taolong ea lik’hamphani tsa melata. Sello se seholo sa likhukhuni ke hore sechaba sa Mozambique se futsanehile empa babusi ba khora le melata.
Ho sa le joalo, Mongoli e Moholo oa SADC, Elias Magosi o ile a etela ntlo-kholo ea sesole sa SAMIM, Pemba, libekeng tsa ho feta. Ke hona moo a phatlalalitseng hore SADC e tlil’o hula masole a eona ka khoeli ea Phupu 2024. Magosi o itse ba se ba qalile ho hula mabotho ‘me tebello ke hore ka Phupu masole ‘ohle a be a hutsoe.
Colonel Tefo Ramosie, molauli oa lebotho la pele la Lesotho, Mozambique
Leha SADC e hula sesole sa eona, bahlopholli ba litaba tsa tšireletso ba re boemo ba tšireletso bo ntse bo le lerootho. Litlhaselo tsa marabele li totile kaha ho se ho bolauoe masole a fetang 30 esale selemo sa 2024 se thoasa.
Nakong eo marabele a tsibolang ntoa ka 2017, k’hamphani e kholo ea France ea mafura, TotalEnergies e ile ea koala tšebetso ea eona ho rafa khase. Masole a SADC a huloa tjena e le ha TotalEnergies e le mathuleng a ho khutlela mosebetsing oa ho rafa khase ka letsete la chelete e kaalo ka US$20bn (M 379 bilone – M379 917 774 396).
Mopresitente oa Botswana, Mokgweetsi Eric Keabetswe Masisi le eena o ile a etela masole a hae mafelong a khoeli ea Tšitoe 2023. Ketelong eo o ile a bolella masole hore letšolo la sesole sa SADC Mozambique le tlil’o fihla pheletsong ka Phupu 2024. O re: “Leha ho le joalo, sena ha se bolele hore marabele a tle a nke monyetla ka ho baka merusu hape. Ke rata hore marabele a tsebe hore mohlang re khutlang hape, re tlo khutla re le bohale ho feta.” Masisi o rialo a bua le lebotho la Botswana.
Masole a Lesotho a oeleng moleng oa ntoa Mozambique a mararo: Commando Private Moalosi Khoaele, ea tlalehoang a ile a kula ke lefu la Malaria kamora ho longoa ke monoang, Commando Corporal Lebohang Solomon Mofoka eo ‘muso o hlalositseng a ile a ameha kotsing ea koloi hammoho le Commando private Lebuoajoang Nonyana ea ileng a oela moleng oa ntoa ha sesole se khahlana le marabele.
