Ka moqolotsi oa rona
La 20 ‘Mesa 2023
Ebile khang ea popota Lekhotleng le Phahameng la Maseru ka Labobeli ha akhente ea ‘muso, Adv. Lehlohonolo Phooko a batla hore makoalata a mofu Motlatsi Khoabane a hlahisoe ka pele ho moahloli Tšeliso Mokoko e le bopaki ba hore efeela baqosuoa ba mo faotse ka ‘Mesa 2017.
Nyeoeng ena baqosuoa ke banna ba Ha Tšilonyane; Katiso Ramoreboli, Poloko Masothonyana le Thapelo Tšekeli. Boraro bo qosoa ka ho bolaea le ho faola mofu Motlatsi Khoabane eaba ba nts’a litapole tsa hae ka sepheo sa ho ea etsa moriana oa hore ba fumane mosebetsi o betere. E mong oa baqosuoa, Poloko Masoohonyana o ile a fana ka maipolelo moo a ileng a lumela hore eena kamora ho lilibolotsa litapole tsa mofu o ile a li neha Thapelo Tšekeli.
Maipolelo a Masothonyana a supa hore mohla ba tla bolaea mofu ka ‘Mesa 2017, eo o ne a fihli Motsekuoa khoebong eo Ramoreboli a neng a sebetsa ho eona eaba ba nka qeto ea ho mo fasa ka thapo ea motlakase ba mo isa mahaheng a Ha Tšilonyane ka le reng o ne a il’o utsoa khoebong moo. Ha ba fihla mahaheng, ba ile ba etsa qeto ea ho mo khakhathele lefu kamora moo ba mo faola.
“Re ile ra botsa motho enoa hore habo ke hokae, a re ke Ribaneng. Ramoreboli o ile a re re mo tsolise, ke moo ke ileng ka mo faola eaba ha re qetile ka mosebetsi, Ramoreboli o ile a nka marete a hae a ea hae ka ‘ona. Re ile ra lihela setopo ka lelumeleng eaba ka le hlahlamang, hoa hlaha sebonoang-se-bonoa-ke-bohle, sechaba sa phalla ho tla bona setopo.” Ao ke maipolelo a e mong oa baqosuoa.
Sepolesa se ile sa bitsoa ho tla phutha setopo ‘me mofu o ile a tsejoa e le eena Motlatsi Khoabane oa Ribaneng, Mafeteng.
Nakong eo ‘muelli oa mofapa-hlooho, Adv. Phooko a batlang hore makoalata a mofu a tlisoe khotla e le bopaki, akhente ea baqosuoa, Adv. Khosi Lesuthu o ile a ema thabeng; a re qha! ‘me a kopa hore moahloli Mokoko a se lumelle bochochisi ho hlahisa litapole tsa mofu ka pele ho lekhotla ka le reng ha se ntho e nepahetseng ho etsa joalo.
Moahloli Mokoko o itse nyeoe e phethetsoe ‘me hosane o liha kahlolo.
