RALIFOTO O FANA KA BOPAKI NYEOENG EA MASOLE
Ka Moipone Makhemeng
La 2 Mots’eanong 2023
Kajeno ho hlahile ralifoto oa sepolesa e le paki khotla – Sergeant Tlotliso Mphephoka nyeoeng e ntseng e tsoela-pele Lekhotleng le Phahameng, Maseru ka pele ho Moahloli Moroke Mokhesi.
Mona ho qosoa masole ka polao ea banna ba bararo Lekhoele Noko, Khothatso Mokebinyane le Molise Pakela ka la 16 Mots’eanong 2017, ka hore ba ba fenethetse Setibing, Maseru ba nt’o akhela litopo tsa bao letamong la Mohale.
Moahloli Moroke Mokhesi
Baqosuoa ke Major Pitso Ramoepane, Sergeant Lekhooa Moepi, Captain Mahlehle Moeletsi, Lance Corporal Mahlomola Makhoali, Private Nthatakane Motanyane, Motšoane Machai, Tieho Tikiso, Liphapang Sefako le Nemase Faso, athe Major Litsietsi Monyeke eena o fetohile paki motšoaeli.
Sergeant Mphepoka o hlalositse ha mosebetsi oa hae e le ho tsoela ka ntle ho fuputsa bopaki litlolong tsa molao ka ho nka linepe hara tse ling ekasitana le ho nka menoana sebakeng sa ketsahalo e le ho fa lekhotla bopaki ba liketsahalo sebakeng se joalo.
Adv. Shaun Abrahams, leqoetha la bochochisi
Ke moo babuelli ba mofapa-hlooho Adv. Shaun Abrahams le mphato’ae Adv. Motene Rafoneke ba ileng ba bontša lekhotla lithathamo la litšoantšo tsa bafu tse nyarosang ‘mele ‘me tsona li nkiloe ke eena monghali Mphephoka.
Monghali Mphephoka o re linepe tsena o ile a li nka a le Lesotho Funeral Services moo a ileng a fumana litopo li se ntse li hlophisitsoe hore a nke lifoto. O itse baamani ba ile ba thusa mafokisi ho tseba litopo tseo.
Ha a tsoelapele, o bontšitse ha litopo li ne li senyehile haholo kahona baamani ba ile ba atleha ho tseba bafu ka liaparo tse ‘meleng ea bona.
Adv. Motene Rafoneke, leqoetha la bochochisi
Ho sa le joalo, e mong oa babuelli ba baqosuoa Adv. Letuka Molati o ile a betsa lipotso tse ‘maloa ho paki; a e botsa hore na e ile ea ela-hloko hore nakong eo ho ntseng ho etsoa lipatlisiso ho ne ho na le sehlopha sa sepolesa se neng se bitsoa Tokho ‘me Tokho e amahanngoa le ho otla batho. Paki e ile ea fetola ka hore e kile ea utloela ka eona le hoja a sa tsebe na efeela ba ne ba tokhotsa batho.
Adv. Molati o ile a boela a botsa hore na paki nakong ea lipotso e ne e le sieo, a re na o bile teng feela nakong ea linepe. A boela a re ka ho tšoana na o ne a le sieo nakong eo ho latuoang litopo letamong ‘me paki ha e fetola e ile a hlolosa hore efeela ho le joalo a bile teng nakong ea linepe feela.
Ho sa le joalo, nyeoe e ile ea nka khefutso kamora hore moahloli a bontše hore e tla boela e khakhatha kamora tinare.
