QAMO: KE ILE KA LLA HABOHLOKO
… KE LLILE 45 MINUTES KAOFELA
Ka Moqolotsi oa rona
La 23 Motšeanong 2023
Moqosuoa Qamo Matela (35) oa Ha Mabote, Berea, ea qosoang ka polao ea mosali oa hae ‘Mahlompho Matela ea ileng a timella sepetlele Bloemfontein kamora ho khakhathoa ke eena moqosuoa ka la 1 Mphalane 2021, o re o ile a lla habohloko mesong ea 11 Mphalane 2021. Latela link ena ho utloa bopaki ba pejana ka sesosa sa lefu la ‘Mahlompho: https://leihlolabasotho.co.ls/ke-tetekile-mosali-oa-ka-ka-litebele-qamo-matela/
Qamo o phetetse lekhotla la moahloli Tšeliso Mokoko oa lekhotla le phahameng hore mesong ea letsatsi le boletsoeng o ile a fumana mohala ho motho ea sa mo tsebeng empa eo ha a lokela ho bua litaba tsa hae o ile a koala mohala a re ho bonahala a kene nomorong e fosahetseng.
“Ke ne ke nahana hore mohala oo o tsoa sepetlele Maseru Private Hospital.”
O tsoela-pele: “Kamora moo ke ile ka letsetsa ausi oa mosali oa ka, e leng Rorisang Mofolo, (paki ea bobeli) ka mo joetsa hore ke fumane mohala ho hlaha Maseru Private, ka ‘motsa hore na sepetlele se buile letho ho eena leo ke sa le tsebeng.
“Ke ne ke ‘motsa joalo ho fumana hore na ba utloileng bona ka lebaka la mohala oo ke ileng ka o fumana. O ile a mpolella hore o ile a letsetsa batho bao a ba botsa hore na ha ho chachara ea fono eo a ileng a e siea ka la maobane.
“Kamora moo ke ile ka leka ho khaleha kaha nako e ne e le 2.30am kameso ka letsatsi leo la la 11 Mphalane 2021. Mohala oa ka o boetse oa lla e le nomoro eo ke sa e tsebeng, eaba ha ke arabe mohala oo.
“Kamora motsotso ka fumana SMS ho hlaha ho nomoro eona eno eo ke ileng ka se e arabe, molaetsa oa SMS o ne o re: “You are a murderer” (O ‘molai).
“Ke ile ka leka ho batla monga nomoro ena, e ne e le ea 58…, ke batla ho tseba hore motho enoa ea reng ke ‘molai ke mang, eaba ke sebelisa Mpesa ho fumana hore motho enoa ke mang, ka fumana hore ke nomoro ea Tšepiso Mofolo.
“Ka bo-3:15am ho ile hoa fihla hoa kokota motho lemating, ka ‘motsa hore ke mang a re ke Luka Koenyama, moahisani oa ka, a re ke bule o batla ho ntjoetsa litaba, ka bula, ‘me ha ke sheba ka bona batho ba bangata ba akhang Monaleli, ausi oa ka, le baahisani ba bang.
“Eaba ke botsa ntate Luka hore na ho etsahalang hoba ke ne ke maketse. Ntate Luka o ile a tla ho ‘na and gave me a hug (a nhaka) ‘me a mpolella hore mohats’a ka o hlokahetse.
“Ha ke utloa seo, ke ile ka lla habohloko, a ntse a ntšoere, ke hopola ke tsietsana ka ba ka oela fatše. Ke ile ka leka ho mo bontša ka matsoho hore ke sitoa ho hema. Kamora moo ha ke tsebe ho ile hoa etsahala joang, empa ha ke hlasimoloha ka ipona ke se ke le betheng ea ka kamoreng.
“Kamora moo, ke ile ka kopa ho sala ke le mong ka kamoreng ea boroko. Ausi oa ka Likhapha Matela o ile a sala le ‘na kamoreng. Ke ile ka lla haholo hape nako e ka etsang 45 minutes, eaba hoseng ka bo-5am baholoane ba ka Moorosi Matela le babang ba fihla ho tla ntlhoela, ba mpolella hore ho na le batho ba bangata ka jareteng eaba re buisana ka ho ea Bloemfontein.
“Re ile ra etsa qeto ea hore ntate Maloi le ntate Thabo ba tla ea Bloemfontein moo mohatsa oa ka a hlokahalletseng teng.” Qamo o boleletse lekhotla joalo. Nyeoe e tsoela-pele.
Ho ea ka sepolesa Qamo o ne a hlalose ha ba ile ba tseka senotlolo, ka hore o ile a kopa mohatsa oa hae hore a tle a nts’e senotlolo sa hae monyako hore a tle a bule a notlolle ha a fihla kaha eena o ne a le joaleng bosiu. Leha ho le joalo, paki e bile e le moholoane oa mofu, Rorisang Mofolo o re mofu o ne a mo bolelle hore sesosa sa qabang e bile hore monna oa hae o ne a mo tsekisa hore o hanne ho fa ‘m’ae M20.
