NGOLISO EA LIKARETE E’A ATOLOSOA
La 24 Phuptjane 2023
Lekhotla la Taolo ea Khaso (Lesotho Communications Authority – LCA) le lokollotse phatlalatso maobane ho tsebisa sechaba hore leha ngoliso ea likarete tsa lifono e ne e lokela ho fihla pheletsong ka khitla ea maobane, la 23 Phuptjane 2023 empa ho na le liphetoho.
“LCA e tsebisa sechaba hape hore ngoliso ea likarete e tsamaile ka katleho lik’hamphaning tse peli, Econet Telecom Lesotho (ETL) le Vodacom Lesotho (VCL) moo lik’hamphani li atlehileng ho ngolisa boholo ba 70% ea basebelisi ba mehala.” E baleha joalo polelo.
Ngoliso ena LCA e re e ea khotsofatsa ‘me e ba beha boemong ba ho koala likarete tsohle tse sa ngolisoang. “Leha ho le joalo, kamora ho ela hloko maikutlo a mang a sechaba a supang ho na le monyetla oa manane a sa hloekang a ngoliso, LCA e fihletse qeto ea ho se koale likarete tsohle tse e-s’o ngolisoe. Sena se etsoa e le ho ikholisa e le ka ‘nete hore manane a hloekisoa hore a khotsofatse.” Ke polelo ea LCA.
Sechaba se hlokomelisoa hore hang ha ts’ebetso ea ho hloekisa manane e phetheloa likarete tsohle tse sa ngolisoang li tla koaloa. Batho ba e-s’o ngolise ba eletsoa ho potlakela ho ea ngolisa ho qoba hore likarete tsa bona li koaloe.
“Ho netefatsa hore u ngolisitse karete ea hau penya *101# ha u le mosebelisi oa Econet. Ha u sebelisa VCL penya *999#.” E rialo phatlalatso ea LCA.
