PAKI E ‘REKISITSE’ BANANA M1600 GAUTENG
Ka Moipone Makhemeng
La 8 Hlakola 2024
Moqosuoa Nyatso Mokete (23) oa Koalabata, Berea o fetohile paki-motšoaeli nyeoeng eo ho qosoang Mpho Ramonosi (50), monna oa Mosotho ea lulang Gauteng ka liqoso tsa thekiso ea baroetsana ba bararo le peto ea bona ka Phuptjane 2022. Bala likateng tsa qoso 👉🏼 MONA ka botlalo esita le ho utloa mapaki a mahlatsipa.
Nyeoe e tsoetse-pele maobane e mametsoe ke ‘maseterata e moholo, ‘Matankiso Nthunya oa Maseru. Ramonosi o qosoa le Sehlomeng Labane (25) oa Koalabata, Berea le ‘Mamanyesemane Thoabala (38) oa Ha Foso, Berea, athe moqosuoa e mong Mokete ke eena ea fetohileng paki-motšoaeli.
‘Matankiso Nthunya, ‘Maseterata e Moholo
Mokete bopaking ba hae ba sehlooho o bontšitse ka la 23 Phupu 2022 a ile a teheloa mohala ke moqosuoa oa pele Ramonosi, a re a mo latele morali oa hae sebakeng sa Sekamaneng ho mo isa ho eena Afrika Boroa Rusternburg, Muruleng.
O re ka la 26 Phupu 2022, o ile a ea le e mong Potso Sekamaneng ho ea lata morali ea seng a boletsoe. O re ho fihleng hoa bona ba fumane ngoanana e monyenyane ‘me a itlhalosa hore o ronngoe ke mang. Kamora moo o ile a letsetsa moqosuoa ka WhatsApp Call a nt’o nehelana ka fono ea hae ho morali hore a bue le Ramonosi.
O teketse lekhotla hore kamora puisano ea bona moroetsana o ile a re a ke ke a tsamaea ntate oa hae a sa tsebe. Ke moo a hlalosang ha Potso a ile a botsa hore na ho etsahalang ha eka morali o na le bo-ntate ba bangata tjena. O re ba ile ba letsetsa moqosuoa e mong, Sehlomeng Labane eo le eena e seng e le paki-motšoaeli ho fana ka tlhaloso kaha Ramonosi a ne a mo file linomoro hore a ka buisana le eena ha a thulana le mathata a ho fumana morali. “O ile a re e complicated.” Oa hlalosa.
Mpho Ramonosi
Ha a tsoela-pele o re letsatsi le hlahlamang o ile a lata moroetsana ‘me a fumana a na le motsoalle oa hae eo a ileng a hlalosa le eena a batla ho tsamaea. Bobeli ba ne se ntse ba itokisitse.
“Ke ile ka letsetsa ntate Mpho ka mo bolella hore joale moroetsana o batla ho tsamaea le motsoalle oa hae. O ile a re ke mo fe fono ‘me ha ba qeta ho bua a re tloho le bona.” Ke paki-motšoaeli. O boetse a tlalehela lekhotla hore Ramonosi o ile a mo lefa chelete e kaalo ka M1600 ka marang-rang (E-wallet) ho tsoa bankeng ea FNB nomorong ea hae ea Afrika Boroa. Kamora moo o ile a felehetsa baroetsana a ba isa sebakeng seo a neng a se romelletsoe Rusternburg.
O boleletse lekhotla hape hore o ile a khutlela Lesotho ha a qeta ho isa baroetsana, Rusternburg. Nakong eo a fihlang Lesotho letsatsi le hlahlamang lihoreng tsa tinare o re o ile a fumana mohala ho tsoa ntlo-kholo ea sepolesa a ntse a na le Potso. “Mohala o ne o re ke itlalehe sepoleseng ho thoe ke utsoitse bana ka ba rekisa.”
Ho ea ka tlhaloso ea hae, ka lona letsatsi leo o ile a palama ho khutlela Rusternburg ho lata bana bao. “Ha ke fihla mono ke ile ka ba ka ba nka ka likhoka e le hobane ba se ba hana ho khutlela hae.” Oa hlalosa.
Ha a qeta ka bopaki ba hae, ‘muelli oa moqosuoa Ramonosi, Adv. Nhlapho, o ile a hloma paki lipotso.
Adv. Nhlapo, ‘muelli oa moqosuoa oa pele
Har’a lipotso ebile hore na polokelo ea banka e neng e mo romella chelete na o na le bonnete ba hore ke ea moqosuoa. Paki e ile ea tiisa seo ka hore mabitso a ne a supa joalo esita le melaetsa ea eona e ntseng e le teng fonong ea hae e ileng ea bolokoa ke sepolesa e le bopaki.
“Moqosuoa o re ha a e-s’o u romelle chelete ka E-wallet. O re ha a na polokelo ea FNB hohang, ‘me u ntse u mo tlama feela.” Adv. Nhlapho o beha ho paki. Ho sa le joalo, ‘muelli oa moqosuoa o bontšitse ha paki e buile litaba tseo e li tekileng kapele ho lekhotla hobane e ile ea khakhathoa ke mapolesa. Leha ho le joalo, paki e latotse hore e ile ea khakhathoa; empa e ile a botsisisoa ka thata feela. “Ha u re ba ile ba u botsisisa ka thata u bolelang?” Leqhoetha le botsa joalo.
“Ke rialo hobane ho na le nako eo ba neng ba mpotsa; e mong oa mapolesa o ile a nkotla ka tlelapa, ha ba nkhakhatha.” Mokete o hlalosa joalo ebile a supa hore ba mo otlile ka limpama tse peli tse tharo feela.
Adv. Nhlapho o ile a boela a beha kapele ho paki hore e mong oa lipaki o ile a teka hore paki ha e fihla ho bona e hlalositse ha e khakhathuoe ka lebaka la bona. Kahona o tlil’o ba lata. O ile a bontša paki hore seo a se hlalositseng ho bao se fapane le seo a se hlalosetsang lekhotla.
Ha a lihella likhala, Adv. Nhlapho o behile ho paki hore moqosuoa ha a tsebe paki eo ho hang ‘me seo o se netefalitse ka hore lekhetlo la pele ha ba qala ho kopana sepoleseng, lepolesa Moerane o ile a mo botsa na o tseba moqosuoa empa a re che. A re hoo e ne e le ‘nete kaha ehlile a sa tsebe moqosuoa ho hang ebile ba e-s’o kopane kapa hona ho bua mohaleng le eena.
“Ke tla lumela joalo hobane nako eohle re ne re bua le eena ka mohala. Ke ne ke qala ho kopana le eena ha ke ne ke isa ngoanana e mong ‘me e ne e le mantsiboea ha kea mo bona.” Paki e hlalosa joalo.
Adv. Nhlapo o ile a tekela lekhotla hore paki-motšoaeli e hlahileng ka pele ho lekhotla (Mokete) ke “setloli sa molao” se lekang ka hohle ho itšoasolla holima qoso.
