NYEOE EA BOSHOLU BA MATSEBE-TSEBE A SEKOLO E TSOELA PELE
Ka Moipone Makhemeng
La 31 Phato 2023
Banna ba bahlano le mosali, Lehlohonolo Selate, Rethabile Khatleli, Phanyake Mokhahlane, Lehlohonolo Ts’iu, Maboloka Matjoa le Lineo Mohale ba hlahile kapele ho ‘masetereta Thamae Thamae Maseru kajeno ho mamela nyeoe ea bona moo ba qosoang ka bomenemene le bosholu ba ho utsoa chelete ea sekolo sa booki – Maluti Adventist College.
Ho ea ka lengolo la qoso, baqosuoa ka la 7 Pulungoana 2017 ba le haufi le sekolo sa Maluti Adventist College, Mapoteng, Berea ba ile ba utsoa lipampiri-chelete tse tharo tse neng li sa ngoloa letho tsa sekolo se boletsoeng ‘me ba ea le tsona Maseru.
Lehlohonolo Selate, moqosuoa oa pele [Image – Maseru Metro]
Qoso ea bobeli e supa hore ka la 17 Pulungoana 2017 ba ile ba ea bankeng ea Standard Lesotho Bank Pioneer Mall, Maseru ‘me ba nehelana ho banka lipampiri-chelete tse neng li bonts’a li ngotsoe ke sekolo se boletsoeng ‘me li etsetsoa k’hamphani ea Formosa Enterprise.
Kamora ho rokoa mahloana-a-naketsana, banka e ile ea ba fa chelete e kaalo ka M316, 200.00 ho tsoa polokelong ea Maluti School of Nursing eaba ba ile ka eona.
Qoso ea boraro ke hore ba ile ba bula polokelo ea banka ba sebelisa mabitso a lefofo le litokomane tsa bolotsana tsa Gladys Masupha le Formosa Enterprise.
Paki ea pele ea mofapa-hlooho nyeoeng ena kajeno e bile monghali Sello Rakojoane. Eena ke mosebeletsi oa banka ea Standard Lesotho Bank. O itlhalositse a sebetsa ofising ea lefapha la ts’ebetso ea ho boloka litokomane.
Ha a tekela lekhotla ka moo a tsebang litaba ka teng o itse;
“Ke ile ka fumana mohala ke le hae moo ke phelang Mohalalitoe, Maseru. Oona o ne o tsoa ho motsoalle oa ka Poki a mpolella hore o fane ka linomoro tsa ka a re ho na le motho ea tla ntetsetsa ho kopa thuso mabapi le polokelo ea hae ea banka.
“Ke ile ka fela ka fumana mohala ho motho ea ipitsitseng Rethabile a nkopa ho mo thusa hore a nts’e chelete kahare ho karete hobane karete ea hae e lahlehile. Kaha ke ne ke sa theohela letsatsing leo, ke ile ka mo ts’episa ho e sheba ha ke fihla mosebetsing ‘me ka kopa hore a nthomelle nomoro ea polokelo.
“Letsatsi le hlahlamang ke ile ka kena ka hare ho polokelo ena ho netefatsa hore ho joalo ke ea hae. Empa ka fumana lintho tse batlang li ‘makatsa. Motho ea neng a kopa thuso ke monna empa mabitso a monga polokelo e ne e le a mosali e leng Gladys Masupha. ‘Na ke ne ke lebelletse Rethabile.” Paki e teka bopaki joalo.
O bonts’itse hore o ile a leba faeleng ea monga polokelo teng a fumana hore likopi tsa litokomane e leng pasa hara tse ling mabitso e ne e le a mosali ea boletsoeng. O itse polokelo e ne e se e kopanetsoeng kahoo o ile a fetisetsa litaba ho motho oa setsebi sa lipatlisiso (forensic) monghali Lesole Chikando empa ho Rethabile a li siea feela ka hore a itlalehe lekaleng bothata bo hloka a lebe teng ho fumants’oa thuso.
Moqosuoa oa bobeli e leng Khatleli eo a neng a ipuella ka khotla o ile a botsa paki hore na joalokaha e bonts’itse hore b’a tsebana e bile e le batho ba atamelaneng na o ile a utloa a ts’oants’a lentsoe kaha mabitso a utloa hore a ts’oana esebe o ntse a re ke eena. Paki e ile ea araba ka hore litaba li etsahetse khale haholo kahona ha a sa li hopola.
Ho feta mona, Khatleli o ile o tekela lekhotla hore o na le polokelo ea banka e boletsoeng ea khoebo ea ho tloha ngoaheng ea 2012 ‘me polokelo e boletsoeng ha se eona ea hae esita le linomoro tse boletsoeng ha se tsa hae.
Ntle ho mona, babuelli ba baqosuoa ba bang ha ba ka ba botsa lipotso ka bopaki bo tekiloeng.
Ho sa le joalo, paki ea bobeli ea mofapa-hlooho le eona e ile ea tiisa bopaki bo fanoeng ke Rakojoane a supa hore o fetse o ile a fetisetsa litaba tse joalo tseo le eena a ileng a kena ho tsona ho ikholisa. O hlalositse hore o ile a boela a bona mophula oa chelete e hlahang ho hlaha bankeng ea Nedbank e kena ho ena e boletsoeng ‘me mabitso e ntse e le a Gladys. O teketse lekhotla hore ha litaba li le mothating oo o ile a li fetisetsa matsohong a sepolesa.
Mochochisi Motiki o ile a botsa paki hore na kamor’a ho siea litaba matsohong a sepolesa na ba ile ba khutlela ho eena ho mo tsebisa na lipatlisiso li hakae.
“Ho joalo, ho ile hoa thoe moqosuoa oa pele, Selati ho bonahala a sebelisitse polokelo e boletsoeng ka makhetlo a ‘malloa mechining ea tobetsa (ATMs).” Chikando oa araba. Nyeoe e tsoela.
