NUL E KOETSOE KAMORA MERUSU
La 30 Motšeanong 2023
Kamora merusu e bileng kajeno hekeng le ‘mileng o haolang haufi le National University of Lesotho, Roma bookameli ba sekolo bo lokollotse phatlalatso e laelang baithuti bohle sutha kahara jarete ea sekolo hang-hang ho tloha ka 2:30 pm.
Baithuti ba qalile boipelaetso kajeno hoseng ka ho koala tsela ka majoe ekasitana le ho chesa patsi ka ‘mileng ‘me sephethe-phethe sa sitiseha ho phalla hoo bo-ramakoloi a Roma le metseng e memg ho ea Semonkong ba llang ka hore khoebo ea bona e thefulehile kajeno.
Sepolesa se ile sa romela sekolong moo ‘me sa beha maemo taolong leha baithuti ba pshatlile meaho e meng e haufi le tsela ka majoe.
Eric Adoro, letona la lichelete kahara Lekhotla la Baithuti o hlalositse sesosa sa boipiletso ka tsela ena: “Ha e le hantle selemo sa lithuto se ne se tlameha ho fela ka la 28 Motšeanong 2023 empa ka mabaka, bookameli ba sekolo bo ile ba eketsa nako ea sekolo. Ha maemo a le tjena, baithuti ba lebeletse ho fumana chelete ea litsiane ka la 1 Phuptjane 2023.
“Ha nako ea sekolo e lelefatsoa re tlameha ho fumantšoa litsiane.”
Ha maemo a le tjena re le SRC re ile ra ba le phutheho le setsi se fanang ka lihlapiso (National Manpower Development Secretariat Sponsorship – NMDS) re se tekela taba ena ea ho lelefatsoa hoa nako ea lithuto empa phutheho ea rona e felile ba sa re fe tšepo ea hore re tla fumana litsiane. Ehlile re bona re shapa e khathetseng. Kahona baithuti ba nkile qeto ea ho ipelaetsa khahlanong le taba ena.
“Baithuti ba bang ha ba e-s’o fumane litsiane tsa bona tsa bolulo, liporojeke le tse ling tse saletseng morao.” Adoro o hlalosa joalo a bua seea-le-moeeng.
Ho sa le joalo, NMDS e supile e sa il’o kopa tlatsetso ka ‘musong ho sheba hore na baithuti ba tla fuoa litsiane joang nakong ena e lelefalitsoeng.
