NTSUKUNYANE KHOTLA HAPE KA BOSHOLU BA M2.1 MILONE
Ka Moipone Makhemeng
La 31 Phato 2023
Kamora ho hlaha lekhotleng la ‘Maseterata, Maseru ka la 16 Phato 2023, a qosoa le Mongoli e Moholo oa mehleng oa Lekala la Puso ea Libaka le Borena, Lefu Manyokole monna oa Mosotho e bile e le mohoebi Pitso ‘Bikerboy’ Ntsukunyane (27) oa Lithabaneng, Maseru o hlahile khotla hape bekeng ena ka la 29 Phato 2023. Nyeoeng ea pele o ne a qosoa ka bosholu ba bomenemene ba chelete ea ‘muso e kaalo ka M4.5 milone ‘me khetlong lena o qosoa ka bomene-mene ba ho ikhapela chelete ea ‘muso e kaalo ka M2,196,128.55. Nyeoe ea pele e ka baloa ka ho penya mona.
Pitso ‘Biker Boy’ Ntsukunyane
Lengolo la qoso le re ka la 30 Tlhakubele 2022 haufi kapa Lekaleng la Metsi Maseru, moqosuoa o ile a fana ka leseli la bohata le ho pata ‘nete. Ho ea ka lengolo la qoso, sena o se entse ka ho hlahisa Lekaleng la Metsi, leshano la hore k’hamphani ea hae – LL Construction – e na le boiphihlelo ekasitana le ho tseba mosebetsi oa ho lokisa lipompo.
Lekala la Metsi le ne le batla lik’hamphani ho iketela mosebetsi oa tokiso ea lipompo tsa metsi a nyolloang fatše ka motlakase oa letsatsi sebakeng sa Ha Monyake, Kholokoe, Mafeteng.
Ho thoe moqosuoa o ne a tseba hantle hore LL Construction ha e na boiphihlelo bo hlokahalang mabapi le mosebetsi oo. Ka lebaka la mafosisa a moqosuoa, LL Construction e ile ea fuoa mosebetsi o boletsoeng, eaba ‘muso oa Lesotho o lahleheloa ke chelete e kaalo ka M 1,393,993.20. Qoso mona ke ho utsoa chelete ea ‘muso ka boqhekanyetsi.
Ntle ho moo, moqosuoa o tobane le qoso ka hore ka la 20 Tšitoe 2022, o ile a hlahisa ho liofisiri tsa Lekala la Metsi hore k’hamphani ea hae, LL Construction e qetile boholo ba mosebetsi joalokaha ho hlaha lethathamong la tlaleho ea mosebetsi (bill quantities).
Moqosuoa o ne a supa hore o lokela ho lefshoa empa a ne a tseba hore ke leshano ha ho mosebetsi o entsoeng oa fela. ‘Muso o ile oa lefa chelete e kaalo ka M802,135.35 empa ho se mosebetsi o felileng. Qoso e re Biker Boy o ikhapetse chelete eo ka bobolu le bomenemene.
Kamora ho balloa litokelo tsa hae ‘muelli oa hae o ile a mo kopela beile ‘me a laeloa ho itefella M10 000 eo a atlehileng ho e lefa. O tla boela a hlaha khotla ka la 5 Loetse 2023.
