NTSEBENG KHOTLA KA HO SELAKHA QOQOTHO EA GOMENI
Ka Moipone Makhemeng
La 15 Motšeanong 2023
Lebohang Ntsebeng oa Mohale’s Hoek Phamong Ha Morena Nthati Bereng, kajeno o hlahile Lekhotleng le Phahameng, Maseru ka pele ho moahloli Tšeliso Mokoko a qosoa ka polao ea Sondane Gomeni (26) ea ileng a bolaoa Ha Ralekone, Phamong ka la 26 Tsitoe 2019.
Paki e hlahileng kapele ho lekhotla kajeno ebile Lance Sergeant Thabo Mokuoane oa sepolesa sa motebo oa Phamong, Mohale’s Hoek.
Lance Sergeant Mokuoane ha a teka bopaki kapele ho lekhotla o hlalosa hore o ile a fumana tlaleho ka morena oa sebaka hore ho bile le ntoa e bakileng lefu sebakeng se boletsoeng ‘me ba potlakela teng hang le mapolesa a mang. O bontša hore ho fihleng hoa bona ba ile ba leba lilomong moo mofu a neng a le hona teng ba tsamaea le banna ba motse le morena.
“Ha re fihla moo ke ile ka bona mofu a rapalletse; sefahleho se shebile tlaase a le kahara metsi ‘me metsi ao a le mafubelu ke mali. Ha ke mo hlahloba ke fumane maqeba a bulehileng a neng a bontša a bakiloe ke sebetsa se bohale.” Lance Sergeant Mokuoane o hlalosetsa lekhotla.
Ha a tsoelapele o bontša hore qoqotho ea mofu e ne e bonahala e selakhuoe ‘me pela mofu ho ne ho bonahala mehato ea maoto. O re kamora moo ba ile ba nka mofu ho mo lebisa ‘moshareng. O bontša hore ke moo hamorao lipatlisiso li ileng tsa mo lebisa ho moqosuoa.
“O ile a nkisa habo moo a ileng a mpha thipa eo a ileng a hlalosa hore ke eona eo a e sebelisitseng ho bolaea mofu.” Tlhaloso ea paki e tsoela-pele.
Mokuoane o re o ile a isa thipa eo ho tlelereke ea lekhotla la ‘maseterata Mohale’s Hoek ‘me ea mo eletsa ho e boloka hofihlela letsatsi la nyeoe le fihla.
‘Ho sa le joalo, ‘muelli oa mofapa-hlooho, Adv. ‘Mametse Mapesela o ile a boela a teka kapele ho lekhotla tlaleho ea ngaka ea tlhahlobo ea setopo e le pontšuoa ea bobeli ho netefatsa hore moqosuoa ke eena ea bakileng lefu la Gomeni. Tlaleho e entsoe Sepetlele Ntšekhe ka la 3 Pherekhong 2020 ‘me e bontšitse mofu a ne a na le maqeba a ‘maloa a bontšang a hlabiloe sefubeng, lebala la hae le le lesootho, matsoho a ruruhile ebile molala o selakhuoe.
Adv. ‘Mametse Mapesela, muelli oa mofapa-hlooho
Ka lehlakoreng le leng, ‘muelli oa moqosuoa Adv. Chondile Wilberforce-Moses o behile kapele ho paki ea mofapa-hlooho hore ‘muelloa oa hae o re batho ba neng ba loana ke mofu le Sello Tšotetsi ‘me mofu o ne a mo loantša feela ntle ho mabaka. Moqosuoa ka ‘muelli oa hae o re eena o ne a le sieo ha ntoa e qala empa ho fihleng hoa hae, Retšelisitsoe Tšotetsi o ile a mo hlalosetsa tsa ntoa ea mofu le Sello empa ke moo mofu a ileng a bitoha lefifing kamorao ho shopo a se a bile a ba loantša.
Ha a tsoela-pele o re ba ile ba baleha empa ba thijoa ke lekorota moo ho neng ho theosetsa. Ke moo mofu a ba fetileng ha bona ba tla mo lelekisa. O hlalosa hore ha mofu a fihla jareteng ea motho ea bitsoang Khafotsa eena o ile a khutla empa ba lelapa la Tšotetsi bona ba mo latella.
Adv. Chondile Wilberforce-Moses, ‘muelli oa moqosuoa
Adv. Wilberforce-Moses o re ‘muelloa oa hae ha a le tseleng o ile a otloa ka lejoe le ileng la mo tsosa fatše ‘me ha a phahamisa hlooho a bona mofu a tsokotsa lebetlela ho mo bata ka lona empa a atleha ho le qoba.
“Moqosuoa o re ke moo a ileng a etsa tlolo ea molao a ntša thipa ho itoanela khahlanong le mofu. O hopola a ile a mo hlaba ha ‘ngoe feela ka thipa eaba mofu oa baleha a bona ha a lelekisoa ke batho ba bang.” Adv. Wilberforce-Moses o li beha joalo a tiisa hore ‘muelloa oa hae o ne a itšireletsa khahlanong le mofu.
Nyeoe e tla e tsoela-pele hape hosane ka hora ea leshome.
