NTOA EA HOLOMO LE LEBAJOA E NKA MOTHATI OSELE
Ka Moipone Makhemeng
La 17 Tlhakubele 2023
Menyenyetsi ea litaba e kuma hore maemo a likamano mahareng a Mok’homishinara oa sepolesa monghali Holomo Molibeli le motlatsi oa hae, DCP Beleme Lebajoa a ntse a sithabela ho feta pele kaha Mok’homishinara Molibeli o amohile DCP Lebajoa balebeli ba hae ba mapolesa.
Ho ea ka mohloli oa litaba tsena, DCP Lebajoa kamora ho tsekisoa balebeli o ile a kopa bonamoli ho letona la sepolesa, Lebona Lephema ‘me hajoale balebeli ba hae ke ba khethiloeng ke eena kamor’a hore letona le kene lipakeng.
Mehloli e supa hape hore DCP Lebajoa o ile a hlahlela nyeoe lekhotleng moo mookameli oa sepolesa a ntseng a lebeletsoe ho kholisa lekhotla mabaka ao ka ‘ona a amohileng Lebajoa balebeli. Maemo a bosula a tšebetso lipakeng tsa Molibeli le Lebajoa a qalile khale ho tloha selemong sa 2021 kapa moraonyana.
DCP Beleme Lebajoa [Photo: LMPS)
Ke moo hamorao mapolesa a lebelang Lebajoa a bitsitsoeng ka le reng le ‘ona a nkha lefotha litabeng tsena.
Ho pakahatsa likamano tse bolila mahareng a bo-maqoqoshela bana, mohloli o bontšitse ha likamano li ile tsa senyeha mohlang Mookameli Molibeli a laelang DCP Lebajoa ho tsoa ka ofising eo a neng a sebeletsa ho eona ka selemo sa 2021 kamora hore e mong oa basebetsi-‘moho a lle ka hore ea hae ha e maemong a matle. Empa leha ho le joalo, monghali Lebajoa o ile a hana ho tsoa ka ofising eo ‘me a mathela khotla ho phephetsa taelo ea mookameli.
Ha litaba li le maemong ana, moqolotsi oa Leihlo la Basotho o batlile maikutlo a DCP Lebajoa litabeng tsena empa a ba sechele ho bua ka tsona. Moqolotsi o boetse a batla lehlakore la sepolesa ho phala ea sona, Senior Superintendent Mpiti Mopeli ‘me eena a re ka mabaka a tšireletso o tla sitoa ho bua ka tsona.
