NTOA E HANA HO LALA SENATENG
La 7 Tlhakubele 2023
Ha Paramente ea leshome le motso o mong e buloa Ntlong ea Senate ka la 3 Pulungoana 2022, litho li ile tsa khetha mofumahali ‘Mamonaheng Mokitimi e le Mookameli oa Ntlo tsa boela tsa khetha Motlatsi oa Mookameli Monghali Tsukutlane Au.
Leha ho le joalo, thatohatsi ea marena a mang a 11 e ne e le Morena oa Sehlooho oa Koeneng le Mapoteng (Mats’ekheng), Morena Peete Lesaoana Peete empa likhetho li ile tsa mo tabanya fats’e hammoho le moikiti e mong Hlomohang Morokole. Mokitimi o ile a khethoa ke litho tse 19 athe Peete tse 11 ha Morokole a ile a fumana tse 2.
Ho hloloa hona ha ho ka ba hoa etsa hore marena a khemang le Peete a inehele habonolo kaha a boetse a ngola lengolo la tletlebo ka hore likhetho li bile le manyofonyofo ‘me balli ba batla hore lifoutu li baloe hape. Li ile tsa baloa ‘me tsa hlaha li ntse li ts’oana le mohla sephetho se phatlalatsoang ka la 3 pulungoana 2022.
Kajeno tulong ea Ntlo ea mahosana, Mookameli o ile a teka puo ea pulo ea Ntlo ‘me a boela a etsa litsebiso. Ke moo ha a qetile Morena oa Leribe, Joel Bolokoe Mots’oene a ileng a ema ka Ntlha ea Tsamaiso a re o makalla hore Mookameli oa Ntlo, Mohlomphehi Mokitimi o entse litsebiso empa a re o makalla hore ha a re letho ka ts’isinyo-tlhoka-ts’epo e kentsoeng khahlanong le eena e le Mookameli oa Ntlo.
Mots’oene o itse: “Ke makatsoa ke hore litsebisong tse ntseng li etsetsoa Ntlo ena e khabane tlhahiso e entsoeng ea ho hloka ts’epo ho uena, ke utloa ho sa buuoe ka eona.
“Mohlomong re sa tsebe hore na ho se buoe ka eona ke hobaneng. Potso ke hore na Tafole kapa Setulo ntlha eo se utloa e se ea bohlokoa feela ho bonahala ho na le litaba tseo re ka buang ka tsona ka eona haholo hoba ha ho bonahale tsamaiso kahara ntlo ena u e nkela hloohong. Taba ena e bonts’a hore ehlile ha re na ts’epo ho uena.” Mots’oene o rialo a hana ho thola leha mookameli a mo laela ho emisa ka puo eo, a mo bolella hore o entse molaetsa o mo biletsang ofising ea hae ho tla mo hlalosetsa lintlha tse itseng ka ts’isinyo ea hae.
Ho ile hoa tlola litlhase ha morena oa sehlooho oa Koeneng le Mapoteng, Peete Lesaoana Peete a ema ka ntlha ea tsamaiso a nyatsa pitso eo Mookameli a reng o e etselitse Morena Mots’oene ho ea kopana le eena ofising ea hae.
Peete o ile a re: “Ntlha ea Tsamaiso ea ka e holima karabo eno eo u ntseng u e fana, ke bona eka u tlo re khelosa. Ha morena a etsa Ts’isinyo e re amang kaofela re le Ntlo joale u il’o buela le eena ofising le le babeli? Na e ntse e le tsamaiso e nepahetseng eo? Na le re etsetsa toka ha le il’o seba le le babeli? Ekare u ntse u etsa hore re hloke ts’epo ho uena le ho feta.
Mookameli o ile a hlalosa hore o ile a bitsetsa Morena oa Leribe ofising hobane ke tokelo ea litho ho etsa litlhahiso ‘me are ofisi e tlameha ho tataisa monga tlhahiso hore e nepahale. O bile a bolella ntlo hore tlhahiso ea ho hloka ts’epo ke hona komiti ea ts’ebetso e tlo e seka-seka kajeno.
Ho ile hoa senyeha ha morena oa Leribe a tlharoa a makalla Mookameli hore na o bolela hore tlhahiso ea hae ha e ea nepahala ‘me mookameli a re ehlile ha e ea nepahala.
“Oa bona hore taba ena ea hore ha re na ts’epo ho uena e bonts’a hore ehlile u re hulanya feela majoeng u sa batle ho mamela litho tsa ntlo ena. Mohlomphehi se ka iketsa mohatelli oa rona. Re litho tse khabane ka mona. Re na le tokelo; hoa hau ke ho bona hore tsamaiso e tsamaea hantle. Re ntse re pheta, a k’u sebetse taba ena ea hore ha re na ts’epo ho uena.
Morena Peete o ile a tsitlalla hore ka nepo mookameli o ne a lokela ho ikhula hore a lumelle hore taba ea ts’isinyo ea ho hloka ts’epo e lokela ho feta kaha mono ke paramenteng. Ntlo e ile ea tsoa taolong marena ao a bua a entse lerata a sa laolehe. Mookameli o bile a laela Rakotjane oa ntlo ho nts’etsa morena oa Leribe ka ntle ho ntlo empa taba eo ha e ka ba ea etsahala kaha Morena oa Leribe o ile a re mookameli oa ntlo a leleke morena oa Matelile hoba a re o ntse a mo rohaka.
“Bana ba Mokhachane ba tlo qabanyoa moo, ha ho ts’abanoe mona.” Ke Morena Peete eo.
Ho sa le joalo, Morena oa Ha Maama, Seeiso Mitchel Maama o ile a khalema boits’oaro bo renang kahara ntlo ‘me a re ba soabile ke seo ba se bonang.
“Taba ea likhetho e ile ea belaeloa, babelaeli ba eona ba re ba batla sepolesa, ba batla DCEO, ba re ho baloe lifoutu. U ile oa ema mane mookameli thoko eaba tsohle tseo ba neng ba li batla li ile tsa phethoa empa babelaeli ba boetse ba ea lla. Kajeno hape paramente e emisoa tsii! Ke tsoafa ha ba sebelisa seakaretsi ke hore ba sebelise seqolli ba re rona litho tse itseng ke rona ba hlokang ts’epo ho uena.
“Ha ho se ke hoa sebelisoa sekaretsi kaofela hobane rona re ne re ipolele mona ka lebokoseng hore re ntse re na le ts’epo ho uena. Rona re marena ‘na haeso ke Ha Maama ke tlisitsoe mona ke sechaba sa Maama hore sechaba se tsebe hore ke mona ka mathata a sona, sechaba se lapile, ka mona re tlile ho tla seka-seka mathata a sechaba.
“Ke ntse ke bona hore ntho ena ea hore ho hlokoa ts’epo hantle ho tsekoa litulo. Mohlomong mookameli ke hore u ba fe litulo tsena tseo ba li batlang kahona ho tla ba le khotso kahara ntlo ena.” Ke Morena Mitchel Maama eo.
Ho boetse hoa qhoma lerata; morena oa Leribe le oa Mats’ekha ba nyatsa ha Morena oa Ha Maama a re ho tsekoa litulo.
“Ke mang ea reng re tseka litulo?” Ke bona ba makala.
