‘MUSO O TŠELA MALAPA A BAFU BA 31 KA METSI
Ka Moipone Makhemeng
La 8 Motšeanong 2023
‘Muso oa Lesotho ka Lekala la Machabeng o ile oa tsebisa sechaba ka masoabi koluoa e oetseng Basotho ba 31 ba ileng ba shoella morafong o koetsoeng oa Harmony, Virginia, Welkom Afrika Boroa ka la 18 Motšeanong 2023. Babali ba ka ikhopotsa litaba tseo ka ho bala mona. Hang kamora phatlalatso ea koluoa ena letona la Machabeng, Lejone Mpotjoane o ile a etsa polelo paramenteng a bontša ha ‘muso o itlama ho bona hore litopo tseo li tla tlisoa hae ka litšenyehelo tsa ‘muso.
Leihlo la Basotho le atametse ofisi ea liphatlalatso Lekaleng la Machabeng maobane ‘me la buisana le mofumahali Teboho Mapetla, ofisiri ea liphatlalatso. O bontšitse hore ho ntse ho faretse tekong ea ho ntša litopo tsa Basotho bao mokoting.
“Litopo ha li e-s’o ntšoe ka mokoting, boemo bo ntse bo le joalo. Batho bao ba ile moo ka thoko ho molao, kahona morafo ha o nke boikarabelo ho ba ntša. Le sepolesa sa Afrika Boroa ha se nke boikarabelo.
“Batho ba ntseng ba leka matsapa a ho ba ntša ke batho feela e leng bo-mphato oa bona ba li-zama-zama. Ke fumane tlaleho ea hore ke hona batho bao ba li-zama-zama ba ntseng ba batla thapo; kea kholoa ba tlo theolela e mong, feela lea utloa hore le eena motho eo o risking le eena [sic] hobane ha ba sure hore na gas e bolaileng bao e ntse e le teng kapa che.
“Ke lakatsa ho hlalosa hore hofihlela litopo tseo li ka ntšuoa ka moo, ‘muso oa Lesotho ke hona o ka tsebang ho lata litopo tseo hobane re sitoa ho ea naheng e ‘ngoe, ho tla tšoana leha re etsa tress pass (re kena ka fole). Ha re ka etsa joalo, re tla be re ile sebakeng seo re se nang tokelo ho sona joalokaha le bona (bafu) ba ntse ba le sebakeng seo ba se nang tokelo ea ho ba ho sona. Ho ea moo ho ka senya likamano tsa rona le Afrika Boroa.
“Maemong a mang ho ee ho be le likotsi tsa mebileng. Ha ba se ba ntšuoe joaloka maemong a mang moo ho bang le likotsi tsa mebileng, batho ba joalo ho ee ho be bonolo haholo ho ba lata hobane ntho e ‘ngoe le e ‘ngoe e ee be e etsoa ka molao. ‘Muso oa Afrika Boroa o ee o re thuse empa maemong ana ‘muso oa Afrika Boroa ha o ke o itlame kannete ka batho ba ileng moo ka thoko ho molao.” O fera litaba joalo.
Leha ho le joalo, Mapetla o bontšitse hore litaba ha li se li eme ka tsela ena, ofisi ea Tona-Kholo ke eona e seng e nka boikarabello kaha e se e le koluoa ea naha ‘me litjeo li ka ba boima lehlakoreng la lekala la tsa machaba.
