‘MUSO O RE KOALLA METSI A MAHALA
… SECHABA SA HA ‘MANTŠEBO SE EA LLA
Ka Moipone Makhemeng
La 26 ‘Mesa 2023
Sechaba sa Ha Mantšebo, Maseru se seboko sa phohomela hore ‘muso o se koalletse lipompo tsa metsi tseo se neng se li etselitsoe hore se khe metsi mahala mathuleng a mebila. Ana ke metsi a fumanehang lipeiping tse kholo tse hlahang letamong la Metolong le fepelang metse ea litoropo ka mabalane e leng, Maseru, Roma, Morija le Teya-Teyaneng.
Kamora hore ho ahoe letamo le hore lipeipi li haole metseng e kang Roma, Thaba-Bosiu, Ha Mantšebo joalo-joalo, ‘muso o ile oa hloma lipompo mathuleng a mebila moo lipeipi li fetang hore sechaba se fumane metsi kamora sello sa sechaba hore ho tla joang metsi a fete metseng ea sona empa sona se hloka metsi.
Puisanong le mok’hanselara oa Ha Mantšebo monghali Sello Molise, o itse Kompone ea Metsi le Likhoerekhoere (WASCO) e ile ea etela sechaba sa moo ho se tsebisa hore morero oa WASCO ke ho tla kenya marang-rang a lipeipi tsa metsi ho lumella sechaba ho hokeloa lipompo tsa malapeng hore se tle se lefelle metsi kaha ho sebelisoa chelete ho hloekisa metsi ao ke WASCO.
Monghali Molise o hlalositse ha sechaba sa tikoloho ea habo se sa ba le bothata ‘me tumellano ea ba teng hore WASCO e tla ba kenyetsa lipompo tseo ba tla lefella metsi. Leha ho le joalo e ile ea ba semaka ha ba bona kompone ena e fihla thoso ho ba koalla metsi.
Ha a tsoelapele o bontšitse hore o se a tsoa lipuisanong le ea tšoereng mokobobo le Mongoli e Moholo oa Lekala la Lirafshoa, monghali Habofonoe Mokopelo ‘me eena o fetotse ka hore o tla buisana le WASCO ho e thibela ho ea koala metsaneng e meng ba lokisetse hore sechaba se fumane metsi pele ao ba tla ikhokella ‘ona malapeng.
Leihlo la Basotho le buisane le eena ea tšoereng molepo e le Mongoli e Moholo Lekaleng la Lirashoa, monghali Mokopelo ea bontšitseng ha litaba tsena li fihlile tafoleng ea hae ‘me a hlalosa hore sebakeng sa Ha ‘Mantšebo WASCO e kentse marang-rang a lipompo ho lumella hore sechaba se etse likopo tsa khokelo ea metsi malapeng.
“Tlhopho e entsoeng ke hore batho ba mono ba ee WASCO ba lo etsa likopo tsa ho kenyetsoa metsi joale bona ho na le moferefere mono o kenyang k’hansele kahare. Batho bana ba na le maikutlo a hore libaka tsa bona ke tsa mahae, ha ba batle ho fuoa litšebeletso tsa metsi ana a lefelloang.” Oa hlalosa.
A phethela ka ho hlalosa hore metsi a ne a reretsoe ho isoa litorotsoaneng tsa mabalane e leng Maseru, Roma, Morija le Teya-Teyaneng. “Ho ile hoa etsoa tlhopho e ‘ngoe hore ho hokeloe sechaba sa metse moo metsi a fetang le teng kaha le sona se ne se hloka metsi. Re bile le liphutheho le lik’hansele tse ling tsa Roma le Thaba-Bosiu re ntse re hlalosa litaba tsena.
“Feela Basotho ba bang ba tsoile taolong hobane ba se ntse ba ikhokella metsi ho marang-rang a entsoeng ka thoko ho molao, ho tla tšoaroa batho hafeela ba ntse ba tlola molao, hoba ba joetsitsoe hore ba hokele metsi malapeng.
“Ba ne ba kha metsi ebile ba a sebelisa hampe; ba ne ba a kha ka meqomo, ba tšella le masimo, joale feela ba ne ba bakela WASCO mokoloto o boima.” Mokopelo o lihella likhala joalo.
