‘MUSO O NYEHLISA LEKHETHO LA JOALA LE KOAE
La 12 Loetse 2023
Letona la Lichelete le Ntlafatso ea Meralo, Dr. Retšelisitsoe Matlanyane o lokollotse phatlalatso ea sehlomathiso sa melaoana ea thekiso ea joala le koae (Tobacco and Alcoholic Products Levy Act, 2023).
Ho latela temana ea 3 le 9 ea Tobacco and Alcoholic Products Levy Act 2023, Matlanyane o re o theola lekhetho la joala ho tloha ho 30% ho ea ho 15% ekasitana le ho theola la koae ho tloha ho 15% ho ea ho 7.5%.
Ho ea ka tokomane ea ‘muso, liphetoho tsena li tlil’o kena tšebetsong ka la 1 Mphalane 2023.
Phetoho ena e tla kamora poboli ea bahoebi ba joala ba akhang Lesotho Chamber of Commerce and Industry (LCCI). Sello e bile hore ‘muso o ile oa petlenya molao ona eaba litholoana e ba tse bosula kaha theko ea joala e ile ea thefuleha ka tsela e nyotobetsang moruo.
Bothata bo bong e bile hore Maluti Mountain Brewery e ne e qobelleha ho fokotsa basebetsi ba ka bang 264. LCCI ka molomo oa Mdu Lokotfwako, o ne a ipiletse ho letona Matlanyane hore mesebetsi eo e sireletsoe.
Dr. Retšelisitsoe Matlanyane ha a araba sello sena ka Motšeanong o ne a satalatse molala a bile a khethetsa makoeba a sireletsa molao ona.
Mdu Lokotfwako, o ne a re ipiletse ho ‘muso ho theola lekhetho la joala
O ne a re molao o kentsoe tšebetsong ho theola sekhahla sa tšebeliso e mpe ea lithethefatsi kaha litlolo tsa molao tse etsahalang ho kenyeletsa tlhekefetso ea basali le lipolaeano boholo li etsoa tlas’a tšusumetso ea tai.
O bile a bontša hore sepheo se seng sa molao oo ke ho nyolla lekeno la lekhetho ka ‘musong.
“‘Muso o fetisitse molao ka ho imamela le ho ikeletsa. Kamorao ho moo ebe k’hamphani (MMB) e ea hlaha e re molao o emisoe! Ke utloa e le tello le ho hobosa ‘muso.” Dr. Matlanyane o ile a beha joalo leha a ile a hula mantsoe ao kamora ho laeloa ho etsoa joalo ke molula-setulo, Mohlomphehi Hakane feela Dr. Matlanyane o ile a supa hore ha se tlhapa mantsoe ao ke a Sesotho.
Ho feta mona o ne a re molao ha o fetisoa ha se batho bohle ba o thabelang empa molao ha o se o le teng o lokela o kene tšebetsong.
Ha a lihella likhala Dr. Matlanyane o re ha ba beha molao ona e le ‘muso, ba ile ba sheba ho ka bang litla-morao tsa molao joaloka batho ba ka kenang lipetlele bao ebang tai e se e ba nyetse.
