‘MUSO O HIRA BANGOLI BA BAHOLO MAKALENG
Ka Moipone Makhemeng
La 28 Phato 2023
Ofisi ea Mongoli oa ‘Muso e ntšitse phatlalatso kajeno e bontšang hore ofisi ea Tona-Kholo e hirile Bangoli ba Baholo ba makala kajeno. Sena tsebiso ea ‘muso e re se entsoe ho latela temana ea 139 ( 1 ) le ( 2 ) ea Molao oa Motheo.
Dr. Moeketsi Letele o tla nka Lekala la Thuto le Koetliso, ha monghali Kananelo Ramashamole a tla tsoa le tsona Lekaleng la Likhokahanyo, Thekenoloji, Mahlale le Boqapi. Mofumahali Mpho Marathane o tla ba Lekaleng la Tekano, Bacha, Lipapali, Bochaba, Bonono le Ntšetso-Pele ea Sechaba.
Lekala la Tšireletso, Polokeho ea Sechaba le Tikoloho le fuoe mofumahali ‘Mabataung Khalane.
Ho feta mona, monghali Thabang Lekhela o tla ba Lekaleng la Machabeng. Mofumahali ‘Makhoabane Ledimo eena o tla ba ho la Bosebeletsi ba Sechaba, Bosebetsi le Khiro. Monghali Lira Ralebese e tla ba motšoara-teu Lekaleng la Toka, Molao le Litaba tsa Paramente.
