MOTHO O BOLAUOE HAPE ROMA
La 1 Mphalane 2023
Ka moqolotsi oa rona
E bile sebonoang-se-bonoa-ke-bohle Hata-Butle, Roma hoseng kajeno moo baahi ba fumaneng monna a rapalletse ka tseleng a shoele. Kamora hore sechaba se eme matlotlosiea, sepolesa sa Roma se ile sa bitsoa ‘me sa fihla hammoho le morena Khoaele Lekarapa.
Ke hona moo mapolesa a ileng a hlahloba setopo ‘me ho shebahala a le maqeba a ho khakhathoa. Kamora ho hlahloba setopo mapolesa a ile a ipiletsa ho sechaba ho fana ka menyenyetsi hore na ke bo-mang ba khakhathileng monna enoa.
Ho sa le joalo, mapolesa a sa le sebakeng sa ketsahalo, menyenyetsi e ile ea hlaha hang-hang:
Mofeta-ka-tsela e mong ea reng ke eena ea boneng setopo pele o hlaloselitse mapolesa joana: “Ha ke hlaha mane ke fumane abuti a sa ntsa a le tjena, a oele fatše. Ke ne ntse ke tsamaea le batho ba bang. Ke ile ka batla ho tseba hore na o oele hoba a tauoe joaloka ‘na. Empa ha ke mo sisinya ke hlokometse hore bophelo ha bo sa le eo ho eena. Ke ile ka kokota matlong a haufi ka tlaleha ka seo re se bonang.” Ho rialo mofeta-ka-tsela.
Ha mofeta-ka-tsela a qeta ho li beha e mong oa banna ba tsebang litaba tsena hantle o hlaloselitse mapolesa ka moo a li tsebang ka teng:
“Ho bile tjena; maobane lipakeng tsa 7 le 8 bosiu. Re ne re le ka moketeng ka mane. Ho fihlile bo-ntate ba bararo ba Khobeng. Har’a bona ntate e mong o supile hore o ile a hlaseloa ke banna ba batla ho mo tšoara poho.
“O re nakong eo bao ba mo hlaselang tseleng o ile a tseba ho tšoara monna e mong ea neng a le haufinyane le eena, a mo qotsa eaba oa itharasolla. Ke moo a ileng a tseba ho tšoara thipa ea Okapi ea monna eo, eaba bahlaseli ba baleha, a sala a tšoere thipa.
“O re o ile a mathela ka bareng e haufi a hlalosetsa banna bao a ba fumaneng ka moo hore o ne a nkeloa joale o atlehile ho tšoara thipa ea bakhosheli. Monna eo o hlalositse a tsebile motho ea mo amohileng thipa.” Oa hlalosa.
Monna o tsoela-pele: “Ntate o ile a bontša bao thipa, a re ‘thipa ea hae ke ena’. Kamora moo, banna ba neng ba le moo tameneng ba ile ba ea moketeng mane ka sepheo sa ho ea tšoara monga thipa, eaba ba kopana le ‘melaelloa tseleng.
“Hang hoba ba kopane le eena ba ile ba mo botsa hore na o tseba thipa e matsohong a bona. “‘Melaellloa o ile a re thipa eo oa e tseba feela a re o e thotse. Hang hoba ‘melaelloa a bontše a tseba thipa, eaba e se e le melamu feela holim’a hae. Bo-ntate ba neng ba mo khakhatha ba ne ba le bangata haholo.” Tlhaloso e joalo.
Setopo sena ke sa bobeli ka nako e khutšoane motseng oa Hatabutle kaha beke e fetileng ka la 28 Loetse 2023, ho ile hoa fumanoa setopo sa ngoana ea ka bang lilemo li ts’eletseng ea ileng a tlalehoa a nyametse ka la 27 Loetse 2023, se lahletsoe kotopong. Ha setopo seo se hlahlojoa ho bonahetse ngoana a sehiloe ka ntho e bohale maqeba a ka bang 12 lehlakoreng la pelo, a bile a sutetsoe polasetiki ka hanong.
