MOSITO O LAELA BAITHUTI BA FOKOTHI HO NGOLA LIHLAHLOBO
Ka Moipone Makhemeng
La 3 Phato 2023
Baithuti ba Lerotholi Polytechnic ka ‘muelli oa bona, Adv. Lepeli Molapo ba hlahile Lekhotleng la Maipiletso maobane khahlanong le Lefapha la Lihlapiso (National Manpower Development Secretariet – NMDS) le botsamaisi ba Lerotholi Polytechnic hammoho le baikarabelli ba bang. Baithuti ba ipiletsa hore Mookameli oa Lekhotla la Maipiletso, Prof. Kananelo Mosito a nke nyeoe ea bona e potlakile.
Sena se tla kamora hore Lekhotla le Phahameng ka moahloli Fumane Khabo, a qhale likopo tsa bona tsa hore ba fuoe lihlapiso leha sekolo se ekelitse alemanaka ea sekolo le sa rerisa NMDS ‘me nako e lumelloaneng likonterakeng e ne e se e tloletse ka nqane.
Leha ho le joalo, Lekhotla le Phahameng le ile la laela hore baithuti ba il’o ngola lihlahlobo ‘me ba kene lipuisanong le mahlakore a amehang ho fihlela tharollo. Adv. Mpo, ‘mueli oa sekolo maobane o boleletse Prof. Mosito hore lipuisano li ile tsa tšoaroa empa ha li ea tlisa tharollo ea letho.
Ha lipuisano li khitla lejoe, baithuti ba ile ba hana ho ngola lihlahlobo ka la 1 Phato 2023 eaba ba mathela Lekhotleng la Maipiletso.
Ha nyeoe e tsoela-pele, Moahloli Mosito o ile a botsa Adv. Molapo hore ke mabaka afe ao a reng nyeoe ena e potlakile. Adv. Molapo o arabile ka hore maemo a renang a bakile mathata a thuto hobane selemo se tlang sa thuto se haufi le ho qala.
A re baithuti ba bacha ba kenang sekolong ba tlameha ho amoheloa ‘me baithuti ba selemo sa ho qetela le bona ba tlameha ho ngola lihlahlobo tsa bona le ho tsoa sekolong.
Prof. Kananelo Mosito
Ho sa le joalo, moahloli Mosito o ile a botsa Adv. Mpo e le ‘muelli oa sekolo hore na lekhotla ha le ka laela hore baithuti ba ngole lihlahlobo; na baithuti ba sa ngolang lihlahlobo ho tloha ka la 1 Phato 2023, sekolo se tla ba lumella ho ngola lihlahlobo tse joalo kapa che. Adv. Mpo o ile a fetola ka hore ho latela litaelo tseo a li fumaneng ke hore ba tla li ngola nakong ea lihlahlobo tsa tlatsetso e le lekhetlo la bona la ho qala.
Prof. Mosito o bontšitse hore mabaka a tekiloeng hore nyeoe e potlakile ha a kholisi lekhotla kahona, ha a bone nyeoe e potlakile kaha baithuti ba sa ka ba shoa ebile ba ntse ba sa tlo shoa ha ba sa fuoe lihlapiso.
Kamora ho hlahloba mabaka a tekiloeng, lekhotla le fane ka taelo ea ho hlakola taba ea hore boipiletso bo potlakile ‘me bo tla mameloa tulong lekhotla la maipiletso ea Mphalane 2023 ke baahloli ba bararo.
“Lea tseba ke le joetse, mona teng ha ho buuoa ‘nete ntle le ho pota-pota ntho e tsekoang ke tlala. Mona ho tsekoa tlala.
“Ba bang ba baithuti ba phelisa malapa a bona le malapa a bona ka chelete ena ea lihlapiso. Khoeli ea Phupu e fetile ‘me re se re bile re kene ho Phato.” Moahloli Mosito oa hlalosa.
Moahloli Mosito o boetse o laetse Lerotholi Polytechnic ho lokisetsa hore baithuti ba ngole lihlahlobo ho tloha ka Mantaha oa la 7 Phato 2023. Ba sa kang ba ngola ka la 1 ho isa 2 Phato 2023 ba lokela ho lumelloa ho ngola nakong ea lihlahlobo tsa tlatsetso.
Kamora hore lekhotla le qhalane, baithuti ba ile ba tloha lekhotleng ba halefile ‘me ba pshatla lebenkele la U-save, le haufi le Memorial Hall ka majoe ke khalefo.
