MOOKAMELI OA LCE MATJALENG ‘KE BOINYAKALATSO LE BANANA’
Ka Moipone Makhemeng
La 14 Phupu 2023
Mookameli oa Koleche ea Botichere (Lesotho College of Education – LCE), Dr. John Dzimba, o behelletsoe ka thoko ho mosebetsi ho tloha ka la 12 Phupu 2023. Sena ke ho ea ka phatlalatso e lokollotsoeng ke lekhotla le tsamaisang sekolo.
Tsebiso ea Lekhotla la sekolo e baleha tjena: “Basebetsi ba Koleche ba tsebisoa ka ho behelloa ka thoko ho mosebetsi hoa Morektoro, Dr. John Dzimba ho tloha ka la 12 Phupu 2023. Hang hoba Lekhotla le eletse ka ea tlang ho tšoara mokobobo ofising ea hae, tsebiso e ‘ngoe e tla etsoa.” Eo ke polelo e lokollotsoeng ke Lekhotla la Sekolo ho tsoa ofising ea Mongolisi, ‘Marethabile Khanyane le ngotsoeng maobane.
Dr. John Dzimba, mookameli oa LCE (Photo Supplied)
Mehloli e tšepahalang ea litaba e re sena se tla kamora hore Dzimba a belaelloe ka hore o ile a inyakalatsa le baithuti ba banana ka mothamahane moketjaneng oa bosiu o neng o tšoaretsoe ha e mong oa litichere jareteng ea koleche.
Menyenyetsi e supa ha pelaelo e re Dzimba hona nakong ea boithabiso a ile a fana ka taelo ea hore koloi ea sekolo e sebelisoe ho ea reka mothamahane. Sena se hlalosoa se le khahlanong le melao ea koleche.
Manyela-koaeng a boleletse Leihlo la Basotho hore pelaelo ke hore kamora boinyakalatso, Dzimba o ile a behelloa ka thoko ho mosebetsi empa a mathela Lekhotleng la Bosebetsi (Labour Court) ‘me lekhotla la laela hore a khutlele mosebetsing.
Menyenyetsi e kuma hape hore Dzimba o ile kena-kenana le lipaki nyeoeng ena ‘me botsamaisi ba Koleche bo ile ba qetella bo mo behelletse ka thoko ho mosebetsi hape-hape.
Ho sa le joalo, Leihlo la Basotho le buisane le Monghali Dzimba empa a latola bosehla hore o behelletsoe ka thoko ho mosebetsi ka lebaka la litaba tse boletsoeng. O itse; “Ha ho na litaba tse joalo. ‘M’e oee, motho ha a qeta ho fuoa, ke eena motho a u fileng litaba tseno a loketseng hore a u joetse hore na ho etsahalang.” Ke Dzimba eo.
Ho feta mona, Dzimba o bontšitse eena a ntse a ikela mosebetsing leha lengolo le mo behellang ka thoko le phatlalalitsoe.
Ha litaba li le tjena, koranta e ile ea mathela Kolecheng ho fumana bonnete ba litaba tsena, empa Mongolisi oa sekolo, mofumahali ‘Marethabile Khanyane a hlalosa ha motho ea lumelletsoeng ho ntša litaba tsa Koleche e le eena mookameli ea behelletsoeng ka thoko. A boela a supa hore ea tšoaretseng mookameli molepo h’a e-s’o be teng.
