‘MONGA’ SOMETHING KAOFELA O BATLA ECONET M3 MILONE
Ka Moipone Makhemeng
La 8 Tšitoe 2023
Monghali Ramputi Francis Mokhethi, monna oa Mosotho ea qositseng Econet Telecom Lesotho o batla matšeliso. O re Econet e sebelisitse fitieo ea hae eo a reng e ile ea tsebahala ka lebitso Something Kaofela.
Nyeoe e mametsoe ke Moahloli Moneuoa Kopo, athe Adv. Tšoeunyane Mokobori o buella molli. Econet e buelloa ke Attorney Qhalehang Letsika.
Attorney Qhalehang Letsika o buella Econet [Image supplied]
Ke hona fitieong ena moo Mosiuoa e ileng ea re ha a Mokhethi a ‘motsa hore o na le linku tse kae ka palo a araba ka hore: “Ke Something Kaofela.” O re fitieo e ile ea mo thabisa haholo eaba o e lahlela ho marang-rang a WhatsApp Status ‘me eaba e pharalla le marang-rang.
Monghali Mosiuoa Hlaeng [Image Ramputi Mokhethi]
Lekhotla le mo botsitse hore na o batla le mo thuse joang ‘me o itse o batla Econet e mo lefe matšeliso a M3,000,000.00 (M3 milone). Ho feta mona, holim’a phaello eo Econet e bokelletseng ka sehlahisoa sa hae o re o batla e mo nyetleletse 65% ea karolo ea phaello e fehliloeng ka tšebeliso ea mantsoe a ‘Something Kaofela’. O boetse o batla hore Econet e mo lefe litšenyehelo tsa nyeoe ena.
Molli ha a tšetleha mabaka o re o ile a utloa letšolo la papatso e ‘ngoe seea-le-moeeng e re “Let’s Do Something Kaofela”. A re mantsoe a Something Kaofela a tsoa fitieong ea hae. O teketse lekhotla hore o ile a makala haholo ha k’hamphani e kholo joaloka Econet e nka mantsoe a tsoang fitieong ea hae ho bapatsa ka sepheo sa ho iketsetsa chelete e sa re letho ho eena.
O re taba eo e ile ea mo tšoenya haholo kaha Econet ha e ea kopa tumello ea ho sebelisa mantsoe a hlahang fitiong ho eena.
“Kaha Econet e sebelisitse sehlahisoa sa ka ntle le tumello ho iketsetsa chelete, ke hloka matšeliso ho Econet.” Oa hlalosa. O itse ha a loantše Econet, empa e mo phoqile ka ho hana ho tla lipuisanong tseo a ileng a li kopa pele taba ena e tla lekhotleng.
O supa hore o ne a lumela hore ha Econet e lemoha sehlahisoa sa ngoana Mosotho e ne e lokela ho mo atamela e buisane le eena. A re o ne a na le tšepo ea hore ha taba ena e le makhotleng, ho ne ho lokela hore ho be le lipuisano lipakeng tsa hae le Econet.
“Nako ea hore re buisane le Econet e ile ea ba teng; ke ile ka ba teng letsatsing la pele le neng le behetsoe hore re tle lipuisanong empa Econet ea se iponahatse. Ho ile hoa khethoa letsatsi le leng empa Econet ea boela ea se iponahatse.” O rialo.
Ho sa le joalo, Econet e hanana le hore mantsoe a sebelisitsoeng a Something Kaofela, ha se ‘nete hore a ile a pharalla kahara marang-rang. Ho feta mona, Econet e hanyetsa hore fitieo e ile ea tsebahala ka lebitso la Something Kaofela.
“Baitšereletsi ba re motho ea manehileng fitieo o ne a etsa joalo ka sepheo sa ho etsa Mosiuoa Hlaeng setšehisa esita le ho mo tlotlolla le ho mohobosa.” Adv. Mokobori o beha ho molli.
Monghali Mosiuoa Hlaeng mohla a fuoang ntlo ke Econet [Image – Econet]
Molli ha a araba taba ena o itse: “Ke utloa e le ntho e makatsang ho thabela ho noa metsi u sa tsebe taba ea seliba seo a tsoang ho sona.” Ke eena a bile a thatiselletsa ka hore fitieo eo ke ea hae e nkuoe ke eena e seng Mosiuoa Hlaeng.
Ntlo eo Econet e e ahetseng monghali Mosiuoa Hlaeng
Ho sa le joalo, ka la 19 Tlhakubele 2022, bookameli ba Econet bo ne bo nehelane ka ntlo ea likamore tse peli ho monghali Mosiuoa Hlaeng ea neng a hlahella fitiong a re sumfing kaofela. Ntlo e ahiloe Sephareng, Bokong Leribe. Econet e ne e hlalose e ahetse monghali Hlaeng ntlo eo e le ho mo leboha ka lepetjo la sumfing kaofela leo k’hamphani e ileng ea le sebelisa lipapatsong tsa eona. Ntlo e nehelanoe e na le thepa ka hare joaloka bethe, raka le tse ling.
Likhang tsa nyeoe li ile tsa khefutsa ‘me nyeoe e tla tsoela-pele hape ka Phato 2024
