‘MOLOI’ O TŠOAROA GLOBAL GUEST HOUSE
Ka Moipone Makhemeng
La 9 Tšitoe 2023
Mosetsana ea itlhalosang e le Itumeleng Lejone (22) ea reng o tsoa Koenaneng, Leribe o tšoeroe mesong kajeno Global Guest House, Naleli, Maseru ka pelaello ea hore ke moloi. Ausi o re o ile moo ho ea nka batho ba babeli ho kenyeletsa mohats’a mothehi oa khoebo eo, monghali Thabiso Mochatso.
Mosetsana o hlalosa a fihlile moo a palame katse empa e ile ea baleha h’a tšoaroa. O re o kene hekeng ea khoebo ka ho nka seriti sa molebeli. “Molebeli o na lutse mono moo a lulang, ke fihlile ka ema pela hae ka nka seriti sa hae, ka kena. Ke kene ke sa bula keiti. Ke ile ka ema pela ntate eno, ka ema pela phafa ea hae eaba kea kena. Ke atlehile ho kena hobane ke sebelisitse lesira la pere.” Mosetsana o rialo.
Mofumahali oa monghali Mochatso, ‘m’e ‘Mathandi Mochatso o re kameso ha nako e ka ba 2am o ile a utloa mokutu eaba o potlakela ntlong e ‘ngoe hang ka mora ho bona batho ba babeli e leng mosebetsi oa moo le motho e mong eo a neng a sa mo tsebe. O re o ile a leka ho tšoara motho eo empa a mo hlola ka matla. Ke moo a reng o ile a mo otla ka setebele hore a tsebe ho mo tšoara kaha a ne a batla ho baleha.
‘Mathandi oa hlalosa: “Ka 2am ke utloile eka baeti ba fihla hobane ke utloa mokutu, empa ka utloa hore ha se mokutu o tloaelehileng. Hang-hang ka letsetsa fono ea kamohelong ea baeti ke batla ho utloa na ke baeti kapa ho etsahalang.” O rialo.
Mosetsana ea ts’oeroeng ka boloi
Ho sa le joalo, mosetsana o hlalosa hore o sebelisoa ke baloi bao a ba bitsang ka mabitso. O bolela a kene khoebong ea monghali Thabiso Mochatso a ronngoe ho tla utloa seo monghali Mochatso a se sebelisang ho etsa moriana oa Global Cure oo a supang ha o pholosa batho ebile o ba bulela litsela.
Mookameli oa Global Cure o ile a bitsa moruti Ben Mosala ea ileng a rapella mosetsana. Bookameli bo bile ba nehelana ka mosetsana ho malome oa hae ea ileng a fihla sebakeng seo. Ho sa le joalo, ho hlahella nkhono oa mosetsana enoa a re o tseba ausi a le Maseru moo a sebetsang lapeng la motho.
