MOKHOTHU O LAHLEHELOA KE LITULO PARAMENTENG
Ka Moipone Makhemeng
La 30 Tlhakubele 2023
Moahloli oa Lekhotla le Phahameng, Moroke Mokhesi o lihile kahlolo kajeno moo Komisi e Ikemetseng ea Likhetho (IEC) e ileng ea hlahlela nyeoe e kopa lekhotla ho e lumella ho fetola kabo ea litulo tsa khekhethane kaha e re e ne e li abile ka phoso ho fa Democratic Congress (DC) tse tharo le se le seng ho Alliance of Democrats (AD).
Moahloli Mokhesi ha a liha kahlolo, o amohetse kopo ea IEC ho aba litulo bocha. Mekha e latelang e tla aroleloa setulo se le seng ho tse ‘ne; Basotho National Party (BNP), United for Change (UFC), Basotho Patriotic Party (BPP) le Lesotho Peoples’ Congress (LPC).
DC e tlo lahleheloa ke litulo tse tharo ‘me maparamente a neng a se a kene ka paramenteng a tlo tlameha ho felloa ke mosebetsi. Ka ho ts’oana, setho sa AD le sona se lokela ho tsoa ka ntlong ea paramente ho suthela ba bacha.
Leihlo la Basotho le nontse moetapele oa BPP, Tefo Mapesela maikutlo ‘me o itse haesale ba ntse ba cho hore litulo tseno ke tsa bona.
