MOHOLOBELA O PHONYOHA CHANKANA
Ka Moipone Makhemeng
La 15 Phuptjane 2023
Mahloko Moholobela (38) oa Ha Pita, ea lulang Ha Thetsane, Maseru o hlahile lekhotleng la ‘maseterata Maseru maobane a qosoa ka tlolo ea molao ea ho tšosa e mong Rampai Matete ka hore o tla mo thunya a ‘molaee.
Tlaleho ea sepolesa e supa ha Moholobela ka la 13 Phuptjane 2023, ka maikemisetso le ka thoko ho molao a le pela liofisi tsa poso, Maseru, o ile a tšosa Matete ka ho mo supa ka sethunya.
Ha e tsoela-pele tlaleho e re Moholobela o ne a le lekhotleng la ‘maseterata pejana ba tlile ka litaba moo Matete a neng a mo qosa ka ho se mo lefe chelete eo a ileng a mo kalima eona. Ke moo eitseng ha ba ntse ba emetse ‘maseterata, Moholobela o ile a hlahisetsa Matete sethunya a ba a mo tsebisa hore ha se le joalo se na le kulo e ngotsoeng lebitso la hae kaha ‘me o tlil’o mo thunya a ‘molaee.
Moholobela ha a ikarabella hang hoba mochochisi Chopho a mo hlalosetse qoso ea hae, o ile a bolela hore ha se ‘nete hore o etselitse Matete litšoso ka sethunya kaha hoo a neng a ho tšoere e ne e le “pepper spray” feela e tsamaeang mokotleng oa hae oa k’homphutha. O bile a e hlahisa ka pele ho mochochisi.
Ho feta mona, o hlalositse hore Matete o hlorisa ‘m’e oa hae.
“Motho enoa ka letsatsi le leng o ile hlasela ‘m’e oa ka. O ile a aena ‘m’e oa ka.” Ke eena a bolella mochochisi.
Moholobela o re Matete o ile a aena ‘m’ae
Sena o hlalosa e le sona sesosa sa hore a roaloe ke pelo a be a qetelle a entse ketso ea mofuta oo ea tlolo ea molao.
Leha ho le joalo, Moholobela o ile a qetella a buisane le Matete nyeoeng ena hore a mpe a mo inele matsoho metsing.
Ba ile ba fuoa monyetla oa ho buisana eaba hamorao ba hlaha kapele ho ‘maseterata moo teng ba ileng ba teka litaba tsa bona ‘me ba tloha mapatlelong a lekhotla ba tsamaea ‘moho ho leba Bankeng ea Poso moo moqosuoa a neng a tšepisitse ho lefa molli ha a qeta ho ntša chelete bankeng.
