MCC E TSOELA-PELE HO NTLAFATSA MPILO
Ka Moipone Makhemeng
La 9 Phato 2023
Lekhotla la Toropo ea Motse-Moholo Maseru (Maseru City Council – MCC) le re le tsoela-pele ka khaho ea litsela ho atolosa ‘mila o moholo oa Mpilo Boulevard. Sepheo sa ntlafatso ena ke ho otlolla tsela ena moo ho nang le mateano a litsela.
Leihlo la Basotho le etetse MCC ‘me la buisana le motlatsi oa ofisiri ea liphatlalatso, mofumahali Ntšeliseng Panyane ho hlalosa tšebetso ena.
“Re tlo koala mateano a litsela a ‘maloa ‘mileng oa Mpilo kaha a baka likotsi. Morero le sepheo ke ho akofisa phallo ea sephethe-phethe le ho ntlafatsa polokeho ea tsela ea Mpilo.
‘Mila o kheloha haufi le Lekhotleng le Phahameng
“Hajoale tšebetso e thakhohile ho phunya tsela e tlo kopanya Nightingale Road ho kena Pope John Paul II road, Katlehong. Mosebetsi o qalile haufi le Lekhotleng le Phahameng ‘me tsela e theohela ka motseng oa Katlehong. Mokonteraka ea abetsoeng mosebetsi ke SCIG-SMG-TIM (joint venture).” Panyane oa hlalosa.
O boetse a re morero oa Mpilo Boulevard Intersections o mekhahlelo e tšeletseng (6 zones) ‘me o tšehelitsoe ka lichelete ke ‘muso oa Lesotho ka kopanelo le Road Fund.
Letona la Mehleng la Puso ea Libaka le Borena, Monghali Moshe Leoma a bua mohla ho phetholoang lekote la khaho ea tsela ena o ne a bolele hore ho tlo sebelisoa chelete e kaalo ka M379 million.
Leha ho le joalo, Panyane o re ba liehile ho qala mosebetsi ho latela lintoa tse telele makhotleng tse bileng li bakileng ho khibela hoa morero ona.
Ho feta mona, Panyane o tobokelitse hore ho ne ho lebelletsoe hore morero o tla nka lilemo tse ‘ne ho phetheloa; e leng ho tloha ka selemo sa 2021 ho isa 2024. Leha ho le joalo, ka lebaka la pherekano e bileng teng, ha ba sa tseba hore morero o tla phetheloa neng.
“Re lumellane le mokonteraka hore a hire batho ba Katlehong hore e-be bona ba unang molemo tšebetsong ena ntlheng ea mosebetsi.” Panyane o phethela joalo.
Mosebetsi o abetsoe mekonteraka e ikopantseng ea SCIG-SMG-TIM (joint venture)
