MATEKANE O LEBOHA MASOLE KA M100 000
… EMPA A BATLA CHELETE EA SADC
Ka Moipone Makhemeng
La 9 Motšeanong 2023
Mehloli e tšepahalang ea litaba e supa hore ke thabo feela malapeng a masole a 120 a lebotho la pele a ileng la ea ntoeng Mozambique ka Phuptjane 2021 eaba a khutla ka 2022.
Tšepiso e ileng ea etsoa ke tona-kholo Sam Matekane e phethahetse kaha masole a hlalosoa a kiba-kiba ka M100 000 motho ka mong.
Leihlo la Basotho le buisane le raliphatlalatso oa sesole Lieutenant Colonel Sakeng Lekola ho netefatsa litaba tsena; “Masole a rometsoeng ka ntle ho naha a mono e le thepa ea ‘muso e le hore boiketlo bohle ba bona bo ikarabella ho ‘muso, kahona LDF ha e boemong ba ho araba litaba tseo mohlomphehi tona-kholo a li buileng e le ‘muso.
“Kea kholoa taba ena e ka botsoa Lekala la Tšireletso kapa liofisi tsa ‘muso tse kholo.” Lekola o araba joalo.
Masole a Lesotho a khutlileng Mozambique
Ho sa le joalo, Leihlo la Basotho le buisane le Mongoli e Moholo oa Lekala la Tšireletso, Maphunye ‘Mamonyane Bohloko: “Taba ena e hlokolosi, it is very sensitive, ke mekholo ea batho; ke litaba tsa batho ‘me ha ke rate ha li ntse li tontontšoa tjenana hoba li tla tlala hohle lipampiring ‘me ke litaba tsa batho ba tsoang ntoeng.
“Ke kopa kannete re ke re bue ka litaba tse ling tse bohlokoa ho ea sechabeng. Ha ke na tla araba litaba tsena tsa masole. A k’u lo botsa raliphatlalatso oa sesole ntate Lekola.” Ho rialo Bohloko.
Maphunye ‘Mamonyane Bohloko, Mongoli e Moholo oa Lekala la Tšireletso,
Ka lehlakoreng le leng, koranta e buisane le e mong oa malapa a masole ‘me a netefatsa hore chelete ba e fumane feela a tšoaela ka hore, ba tlo ngolla tona-kholo ba ‘motse hore na chelete eo ba e tšepisitsoeng ke SADC eona ba tla e fumana neng.
Tona-kholo e ile ea etsa tšepiso ea ho leboha masole ka la 15 Tlhakubele 2023, mohla masole ao a amoheloang semmuso. O ne a re “E le ho ananela tšebetso eo masole a e entseng Mozambique, ‘muso o thakhotse boitlhopho ba ho phethahatsa e ‘ngoe ea lipehelo tsa baholo ba rona e reng ‘mohale oa hapisoa’. Re fihletse qeto eo lehoja mokotla oa ‘muso o le masoba empa rea tšepa le tla utloisisa ha re re ‘sejo senyane ha se fete molomo’.
Matekane mohla a amohelang masole ka la 15 Tlhakubele 2023, Makoanyane
“Kahona behang pelo sekotlolong hoba kamora nako e sa feliseng pelo ‘muso oa habo lona o tla folofela leraha ho phethahatsa tšepiso ena kaha e tlameha ho feta mekhahlelo e fapakaneng ea tsamaiso.
“Re tla bona hore na khoeli ena ea bone kapa ea bohlano re tla ba leboha joang empa nke ke ka bolela hore na re tlo ba leboha ka Maloti a makae. Khoeli ea bone kapa ea bohlano e se ka ba ea fela litšepiso tsena li e-s’o phethahale.
Ka la 19 Motšeanong 2023 o boetse a re: ““Kajeno ke motlotlo ho phatlalatsa mona hore masole ane a bo-rona a 120 a ileng a ea thusetsa Mozambique ntoeng ha bana ba thari ba tsohelane matla, ‘muso oa Motlotlehi o lumellane botsamaising ba ka hore batho bao ba 120, khoeling eona ena (ea Motšeanong), e se ke be ea fela tšepiso ena e sa phethoa.
“E mong le mong oa bona o lokiselitsoe lekholo la likete (M100 000) ‘me chelete eno ba tla e fumana khoeling eona ena.” Matekane o itsatso maobane.”
